Хәзер китап аз укыла. Русия президенты В.В. Путин да халыкның, бигрәк тә яшьләрнең, китап белән кызыксынуының кимүен танырга мәҗбүр. Кайчандыр дөньяда иң күп китап укуы белән мактанган Русиядә китап укучылар саны кискен кимеп бара. Ә бит китап кешенең дөньяга карашын киңәйтә, аның фикерләү сәләтен үстерә, аны дөрес итеп әдәби телдә...
Хәзер китап аз укыла.
Русия президенты В.В. Путин да халыкның, бигрәк тә яшьләрнең, китап белән кызыксынуының кимүен танырга мәҗбүр. Кайчандыр дөньяда иң күп китап укуы белән мактанган Русиядә китап укучылар саны кискен кимеп бара. Ә бит китап кешенең дөньяга карашын киңәйтә, аның фикерләү сәләтен үстерә, аны дөрес итеп әдәби телдә сөйләргә өйрәтә. Китапны бернинди техник чаралар да, радио, телевидение, интернет та алмаштыра алмый.
Китап уку шәһәрдә генә түгел, авылда да кимеп бара. Шуңа күрә яшьләрне китап укырга җәлеп итү (мәҗбүр итеп булмый) мәктәп укытучыларыннан, мәктәп һәм авыл китапханәчеләреннән зур хезмәт, эзләнү, төрле чаралар үткәрүне таләп итә. Шундый чараларның берсе авыл китапханәсе мөдире Гарифҗанова Гөлшат инициативасы, аның тырышлыгы белән үткәрелгән "Үзем ясаган китап" бәйгесенә йомгак ясау кичәсе буларак, 27 ноябрь көнне Олы Мәңгәр мәктәбендә үтте. Бәйгенең максаты укучыларда китапка карата мәхәббәт уяту, талантлы укучыларны барлау иде. Бәйгегә 1 - 7 сыйныф укучылары тартылды. Балалар туган авылга, аның табигатенә багышланган, үз иҗатлары белән, матур итеп бизәлгән, үз куллары белән 5-12 биттән торган китаплар эшләргә тиешләр иде. Кичәдә китап тарихы, китап укуның әһәмияте турында чыгышлар тыңланды, укучылар иҗат иткән китапларга йомгак ясалды. Олы Мәңгәр авыл башкарма комитеты рәисе Хисиатуллин В, китапханә мөдире Гарифҗанова Г, "Әтнә таңы" газетасы хәбәрчесе Шакиров И. Катнашындагы жюри иң яхшы 8укучыны сайлап алды. Яковлева Д, Зиннәтова Л. (3 нче сыйныф), Вәлиева Н. (4 нче сыйныф) кызыксындыру бүләгенә лаек булдылар, Шакиров Р. (5 нче сыйныф) "Иң тарихи китап", Әхмәдиев Г. (5 нче сыйныф) "Иң матур шигырьләр", Фазлыева З. (2 нче сыйныф) "Нәни шагыйрә", Шәрәфиева Э.(5 нче сыйныф) "Иң бизәлешле китап", Мусин М.(5 нче сыйныф) "Иң оста язучы" номинацияләрендә җиңеп грамоталар, кыйммәтле истәлек бүләкләре белән бүләкләнделәр. Кичә нәтиҗәле булды. Ел саен Олы Мәңгәрдә 9 май көнне Җиңү бәйрәмендә авыл җирлегендә иҗат итүче яшьләргә һәм олыларга авылыбыз шагыйре Вильдан Мәхмүт исемендәге премияләр бирелүен дә исәпкә алсак, авылда иҗатка, китапка мәхәббәт тәрбияләнә дип әйтергә тулы нигез бар.
.
