Әтнә таңы

Әтнә районы

18+
2024 - Гаилә елы
Җәмгыять

Олы Әтнәдә хәйрия марафоны

Районыбызда яшәүче, театр бинасының тамаша залына җыйналган инвалидларның бер өлеше дүшәмбе көнне тойгандыр ул җылыны. 14 нче тапкыр үткән "Шәфкатьлелек"марафоны барышында 367328 сум акча җыйналды. Ун көн дәвамында барыбызны берләштергән, бер сулышта яшәткән, арабызда битарафлар булмауны раслаган инвалидлар декадасының йомгаклау кичәсе булды ул көнне. Кимчелекләре дә булгандыр, тиешенчә эшләнеп тә...

Районыбызда яшәүче, театр бинасының тамаша залына җыйналган инвалидларның бер өлеше дүшәмбе көнне тойгандыр ул җылыны. 14 нче тапкыр үткән "Шәфкатьлелек"марафоны барышында 367328 сум акча җыйналды.

Ун көн дәвамында барыбызны берләштергән, бер сулышта яшәткән, арабызда битарафлар булмауны раслаган инвалидлар декадасының йомгаклау кичәсе булды ул көнне. Кимчелекләре дә булгандыр, тиешенчә эшләнеп тә җитмәгәндер, әмма кылган гамәлләребезнең ихласлыгы, җитәкчеләрнең игътибары, җылы сүзләре йөрәктәге бозны да эретерлек иде. Район Советы рәисе урынбасары Айрат Каюмов әйткәнчә, бу чарага һәрбер кеше үз өлешен кертте. "Сау-сәламәт кешегә дә яшәргә авыр заманда, сезгә икеләтә авыр. Сезгә карап сокланабыз, тормыштан тәм табып яшисез. Район хакимияте, аның халкы исеменнән сезгә зур рәхмәт әйтәсе килә. Декада барышында җыйналган акчаны комиссия белән бергәләп мохтаҗларга, ярдәм бик кирәкләргә бүләчәкбез...",- диде ул. Беррәттән районыбызда, үзәк больницада "Ачык мохит" республика программасы кысасында башкарылган эшләргә тукталды. 117 мең сум күчергән мәктәп колективларының тырыш хезмәтенә бәя бирде. Иң сөендергәне: районыбыз инвалидларының, ә алар 2000нән артык, үз җәмгыяте төзелде. Җитәкчесе итеп Олы Әтнә мәктәбенең элекке завучы Сания апа Шәйхиева билгеләнде.

Концерт номерлары социаль яклау бүлеге җитәкчесе Әминә Галиева, ветераннар советы рәисе Мингазиз Зиннәтов, мәгариф бүленге җитәкчесе Гөлүсә Рәхимҗанованың чыгышлары, мәдәният хезмәткәрләре тарафыннан әзерләнгән видеоязмалар белән үрелеп барды. Ә ул язмалардагы инвалидлар белән булган әңгәмәләр аларның яшәешен чагылдырды. Бер минутларын да бушка үткәрмәүчеләр- бәйлиләр, чигәләр, кәрзин үрәләр...- Каенсар авылында яшәүче Факия апа әйткәнчә, "Кулым буш торса үземне "виноват" итеп тоям", дип гомерләренең һәр минутын файдалы итеп үткәрүчеләрдән безгә күпкә өйрәнәсе әле. Ә иң кирәклесе: авырлыклардан зарланмыйча, вакланмыйча, сау-сәламәт икәнебезгә куанып, яшәүнең тәмен беләсебез, тагын да кешелеклерәк булып яшисебез бар!

(Ә марафон барышында җыйналган акчаның исемлеген һәм аның ничек бүленүен алдагы саннарыбызда укырсыз).

Следите за самым важным и интересным в Telegram-каналеТатмедиа


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

2
X