Аздан күңел булганын беләбез, берәүгә дә яңалык түгел. Тормыш мәшәкатьләре иксез-чиксез. Авыл җирендә эше дә бетми. Шулай булса да безне, өлкәннәрне гел кайгыртып торалар. 28 сентябрь көнне Комыргуҗа авыл җирлегеннән Ләйлә Мөхәммәтҗановав бәйрәм белән котлап пакет күтәреп килгән, анда нәрсә генә юк. Шунысы да җитәр әле, моңа өстәп 2 октябрь...
Аздан күңел булганын беләбез, берәүгә дә яңалык түгел. Тормыш мәшәкатьләре иксез-чиксез. Авыл җирендә эше дә бетми. Шулай булса да безне, өлкәннәрне гел кайгыртып торалар.
28 сентябрь көнне Комыргуҗа авыл җирлегеннән Ләйлә Мөхәммәтҗановав бәйрәм белән котлап пакет күтәреп килгән, анда нәрсә генә юк. Шунысы да җитәр әле, моңа өстәп 2 октябрь көнне мәктәптә булачак бәйрәмгә чакырып китте. Олы яшьтә булсам да, күңел унсигездә. Бардым бәйрәмгә. Район башкарма комитеты җитәкчесе Габделнур Мәрдәнов, ветераннар советы рәисе Миңгазиз Зиннәтов та килгән иде. Алар янында үзебезнең хуҗалык җитәкчеләре Әнәс Хәкимов, авыл җирлеге башлыгы Әхтәм Зиннәтуллин, үзебезнең җирлектәге ветераннар советы рәисе Гөлсинә Мөхәммәтҗанова да бар иде.
Бик олылаганнар, бик зурлаганнар. Ул табында ниләр генә юк иде. Килгән җитәкчеләрнең барысы да чыгыш ясады, яшәешебез белән кызыксындылар.Барлык сорауларыбызга да җавап ишеткәч, ветераннар тарафыннан куелган концерт карадык. Аның әйбәтлекләре. Айсия Гобәйдуллина, Назимә Вәлиева, Фатыйма Бәширова, Филсинә гайфуллина, Сания Сәгыйтова, Рафаэль Сибгатуллин, Фоат Сәгыйров татар "Аулак өй" күренешен күрсәттеләр. Үзебезнең яшь чак искә төшеп күзгә яшьләр килде. Аларның чыгышын үзебезнең мәктәп балалары дәвам итте. Беренче сыйныф укучысы Илфатның чыгышын да сокланып карадык.
75 яше тулганнарга үзебезнең ветераннар советы рәисе Гөлсинә Мөхәммәтҗанова бүләкләр дә тапшырды. Берәүне дә онытмаганнар. Бәйрәмгә алып киттеләр, илтеп куйдылар.
Олы кешегә күп кирәк түгел, өс бөтен, тамак тук. Менә шушы очрашу белән Ходай гомерне бирсә киләсе елга кадәр яши ул. Үткәндәге авырлыклар да онытыла. Шулай тәэсирләнеп йөргәндә Комыргуҗа мәктәбе укытучылары килеп керделәр. Бу юлы Халыкара укытучылар көне белән котлаулары. Ул ихтирам, ул хөрмәт! Узегезгә меңе белән кайтсын, сезне дә шулай хөрмәтләсеннәр
