Онытылмасын дисәк хатирәләр

...

Барыбыз да яратып укый торган "Әтнә таңы" газетасы битләрендә, редакция хезмәткәрләре тарафыннан язылган мәкаләләрдә, күзәтүләрдә актив хәбәрчеләр турында һәрдаим язып торалар. Үзеңнең исемне, сиңа бәя бирүләрен күреп бер сөенеп куйсаң, икенче яктан анда язылган сүзләр яңа материаллар эзләргә, аларны матуррак итеп, кеше яратып укырлык итеп язарга этәргеч бирә.

2013 елның "Әтнә таңы" газетасы төпләмәсен актарып утырганда, нишләп әле үзебезнең ветеран авторларның ветераннар тормышын тасвирлап язылган мәкаләләренә анализ ясап, укучылар хозурына тәкъдим итмәскә дигән фикер килде.

Сүземне Мәңгәрдән Илсур Шакировтан башламасам, дөрес булмастыр. Аның үз авылдашлары, остазлары, өлкәннәр тормышы турында язган мәкаләләре- әсәрләре үзе бер тарих. Остазы Зәйфәрә Мәлик кызыннан алып, драматург Туфан аганы сагынуларын, авылның иске изге зиратыннан алып бүгенге көн яшәеш турындагы язмаларын район халкы гына түгел, "Татарстан яшьләре" укучылары да көтеп алалар.

Бәрәскәдә яшәүче Назгөл Садриева исә үзенең мәкаләләрендә Бәрәскә, Бәрәзәдә булып узган һәрбер мәдәни чарага урын таба, олыларның тормышын, мәшәкатьләрен чагылдыра.

Бүгенге көндә "Балкыш" фестиваленең кызган чагы. Авыл сәхнәләрендә ветеран- артистларыбызның шаулатып җырлаулары, ду китереп биюләре беркемне дә битараф калдырмастыр. Ә хәбәрчеләребезнең җылы сүзләре, газетабызга язган рәхмәтләре аларны тагын да дәртләндереп, үсендереп җибәрә.

Сәламәтлекләре чикләнгән кешеләр тормышы турындагы Мөнир Шакировның язмалары күңелдә андыйларга карата хөрмәт уята. Андыйларга җир йөзендә үз урыннарын табарга булышу исән- сауларның бурычы. Нәкъ менә алар эшләгән кул эшләре күргәзмәсеннән оештырылган бәйге турында да матбугат битләрендә матур язмалар урын алды. Республиканың "Моя газета" битләрендә дә районыбыз ветераннары тормышын яктырткан язмалар әледән-әле чыгып килә.

Бөек Ватан сугышында җиңүнең 70 еллыгы якынлаша. Бу уңайдан газета битләрендә язмалар әледән-әле чыгып килә.Мәхмүт Галимҗановның "Әтиемнең хәрби билеты", Олы Мәңгәр мәктәбе укучылары Айзат Филатов, Риназ Шакировның "Сугыш чоры балалары", Раушан Садыйковның "41 ел балалары", Илсур Шакировның хикәя- мәкаләләрендә һәм башка авторларның язмаларында бик күп истәлекләр урын алды. Бу темага язмаларнгы киләсе саннарда тагын да күбрәк күрәсе иде. Сугыш, тыл ветераннары үзләренең тормыш тәҗрибәләре белән яшь буынны тәрбияләүгә өлеш кертсәләр - бик рәхмәтле булыр идек. Мәктәпләрнең тарих, татар теле укытучылары бу эшне үз кулларына алсын иде.

Редакция хезмәткәрләренә дә рәхмәтебез зур. Һәр актуаль теманы, кызыклы фактны тарихка кертеп калырга тырышалар. Безнең ветераннарыбыз яшәрүгә бармыйлар, аралары сирәгәя. Шуңа да бар мөмкинлекләрне кулланып аларның истәлек-хатирәләрен, фотоларын алып каласы иде. Яшь буынга тәрбия чарасы буларак кулланыр идек.