Мәгариф системасында укучыларга белем бирү, яшь үзенчәлеге буенча сыйныфларга бүлеп укытуга нигезләнгән.
Студентлар - төркемнәргә, ә мәктәп укучылары сыйныфларга тупланып укый. Белгәнебезчә, җәмгыятьтә һәр төркемнең җитәкчесе була. Җитәкчесез төркемнең эше алга бармаячак, аны кыерсытачаклар һәм нәтиҗәдә төркем таркалачак. Сыйныф җитәкчесен күбебез, һич икеләнми, "Икенче әни" дип атый алабыз. Чөнки, белем нигезләрен аңлатудан тыш, ул безне җәмгыятьтә үз урыныбызны табучан, тырыш, авырлыклардан курыкмаучан, ярдәмчел итеп тәрбияләү өчен бар көчен куя.
...Саныбыз 7 сыйныфта утыз тугыз балага кадәр җитте. Казак Үртәме балалары безнең мәктәпкә күчкәч булды бу хәл. Бер бүлмәдә утырган утыз тугыз балага укытучыларыбыз нихәл дәрес биргәннәрен үзләре генә белгәннәрдер.
Ә менә сыйныф җитәкчебез Батталова Нурания апаның чәчләрен аз агартмаганбыздыр. Янәшә сыйныфлар "А", "Б" төркемнәренә бүленгәнлектән егермеләп укучыдан гына торалар иде. Кыңгырау шалтырагач, без кабинеттан чыга башласак та елга суы кебек ага идек, соңгыбыз чыгып беткәнче, керүче укучылар түземсезләнеп: "Уф, кайчан бетәләр инде болар - "кырыкка тулмаганнар?" - дип кыбырсый башлыйлар иде.
Безнең кебек шуклыклары белән "югары дәрәҗәдә" йөргән, алты авылдан җыелган "утыз тугызлыларны" тыңлату Сездән зур ихтыяр көче, никадәр түземлелек сораганын үзем унбиш еллап сыйныф җитәкчесе булып эшләгәндә генә аңладым.
Хәтеремдә: Нурания апаның, дүртенче кызын тапкач, хәлен белергә Әтнәгә баруыбыз. Иске шифаханәнең авырулар һәм хәл белергә килүчеләр очраша торган, стенасына зәңгәр кафель ябыштырылган, тәмәке исенә тынчыган, чама белән 4кә 4 метрлы "вестибюл"е - "Афтап әби" биләмәсе бар иде. Шул зал, безнең сыйныф килеп керүгә, "час пик"та РКБ ягыннан килә торган 37нче автобус эче булды да калды. Ник бер кеше керә-чыга алсын. Кухнядан зур кәстерүл белән аш алып килүче санитарка апаларның ризыгы шактый суынды бугай ул вакытта. Нурания апа, 13-14 яшьлек утыздан артык бала, дәрес ташлап, беркемгә дә әйтмичә, бернидән дә курыкмыйча Сезне күрү теләге белән Әтнә юлына чыгып киткән икән, бу инде үзе генә дә күп нәрсәне сөйли. Безне шифаханә буенча стройга тезеп куеп, һәрберебезнең башыбыздан сыйпап чыкканда, йөзегездә күргән күз яшьләрегезнең мәгънәсен, әле генә, яшем 40ка җиткәч кенә, аңлый башладым...
Иң мөһим һәм кызыклы язмаларны Татмедиа Telegram-каналында укыгыз
