Өшкәтәдә авыл юлына таш җәйдерәләр. Әлбәттә, хуҗалык ярдәме белән. Бу хакта бригадир Әнвәр Әхмәдуллиннан сораштым.
- Өченче елны ук, авыл халкы җыелып ярты километр юлга таш түшәде. "Ленин" хуҗалыгы техникасын бирде, - ди бригадир.
Юлны тигезләп, ком салып "мендәрчек" ясау "Ленин" исәбенә башкарылган. Әле мин барында да хуҗалык рәисе бригадирга телефоннан шалтыратып, күпме һәм кайсы өлешкә кирәклеген сорашты. Планлы рәвештә быел тагын 600 метр юлга таш түшиләр. Дөресрәге, тәмамлап яталар. Авылдашлары: "Башлангычы Расих Мәгъсүмовка барып тоташа", дисәләр дә, әлеге абзый редакциягә кереп, "артык зурламавымны" сорады. Ә Илдар Сәгъдиев карьер белән килешү, акча күчерү эшләрендә башлап йөргән. Халыкның күпчелеге аңлап кабул итсә дә, "Машинам юк минем", дип, уртак изге эшкә булышмаучылар да булган. Бик кызганыч, югыйсә ниндидер җиһаз яки печән, салам алып кайту, халыктан сөт җыю, кибеткә ипи китерүнең барысы да машина белән башкарыла. Таш юлдан җәяү йөрергә дә җиңелрәк. Димәк, һәрберебезнең өлеше бар.
Путанай ташын "КамАЗ"лар белән Рамил Хөснетдинов, Шәмсетдин Кинжаев, Илфат Сибгатуллин ташый. Берөзлексез "Олы Бәрәзә - Карьер" юлын таптыйлар. Ташны 15-20 сантиметр калынлыкта җәяләр.
Сокландым - биредә булганны саклый беләләр.
- Һәр язны бер атна дәвамында авылга техника кертмәскә кирәк. Без шулай эшлибез. Язын җир уйный, техника да йөреп, юлны сизелерлек дәрәҗәдә җимерә, - дигән фикердә Әнвәр Әхмәдуллин.
Бер мичкә балга бер кашык дегетсез буламы инде ул! "Шлагбаумны машина белән бәрдереп керүчеләр дә булды", - диделәр. Ә олы апалар, әбиләр көянтә-чиләк белән сөт күтәреп 1 километр чамасы авыл башына кадәр чыгарганнар! Хәтта "Ипи" машинасы да кермәгән. Югарыда телгә алган кибет хуҗасы ипине ат белән, хәтта кул арбасы белән ташыган.
- Рәхмәт яхшы авылдашларга. Алар булмаса, бер эшне дә оештыра алмыйсың, - ди бригадир.
Өшкәтәдә генә түгел, күп авылларда шулай эшләделәр. Икътисади кыенлык кичергән заманда кемдер китереп биргәнне көтмичә, үзеңә тырышырга кирәк шул. Кемдер авылына асфальт даулап йөргәнгә аптырыйм. Бездә дә юк ул. Һәм бездә дә сезнең кебек үк кешеләр яши... Халыктан акча җыеп, таш түшәдек.
P.S. Бүгенге көндә Бәхтиярдә, Олы Мәңгәрнең кайбер урамнарында, Иске Мәңгәрдә, химаяче, авыл җирлеге һәм халык ярдәме белән Югары Сәрдәдә, Чишмәле Сапның кайбер урамнарында, халык һәм хуҗалык ярдәме белән Каенсарда, шулай ук Түбән Көектә, Югары Көектә таш юллар булдырылды. Шушы көннәрдә халык җыелып һәм авыл җирлеге ярдәме белән Арыда, авыл җирлеге булышлыгы белән Бактачыга илтүче коры елга аша узучы юлга таш җәелә башлый.
Иң мөһим һәм кызыклы язмаларны Татмедиа Telegram-каналында укыгыз
