"Гает намазларын укып, Аллаһ ризалыгы өчен корбаннар чалып Аллаһның рәхмәтенә якынаябыз - шуңа күрә бәйрәмебезне шатланып каршы алабыз".
Олы Әтнә мәчетендә узган Корбан Гаетендә иң еш яңгыраган сүзләр иде бу. Быелгы бәйрәм килүчеләрнең күплеге белән игътибар үзәгендә булды. Яңа, дини киемнәрдән килүчеләрне күреп күңел куанды. Дин-кардәшләр арасында районыбыз җитәкчеләре дә булу Корбан Гаетен аеруча күркәм итте.
Олы Әтнә мәчете кечкенә түгел һәм аның бәйрәмгә килүчеләр белән тулы булуы гаять матур күренеш. Бу уңайдан мөселман-кардәшләрнең дин юлына басып, изге гамәлләр кылырга, Ислам кушканча яшәргә омтылуы күңелләргә шатлык иңдерә. Гаетне һәм җомга намазларын да бер дә калдырмыйча мәчеткә йөрүчеләр белән бергә, әле беренче тапкыр гына килүчеләр дә бар иде. Шунысына игътибар иттек - бәйрәм котлавын да, вәгазен дә чын күңелләрен биреп тыңладылар. Шөкер, дин юлына көннән-көн ныграк басалар.
Гает бәйрәме район авылларында да гөрләде. Авылдашлар, туганнар, дуслар бер-берсен бәйрәм белән ихлас котладылар. Башкалар кебек үк Каенсар авылы мәчете дә дин-кардәшләрне иртәнге намазга каршы алды. Аннан авылның ике ягына юл тотып, тәэбир әйтеп янә мәчеткә юл тоттылар. Гает намазына дип өстәлүчеләр исәбенә сафлар шактый тулыланды. Әле кечкенә чагымда ук хәзер инде мәрхүмә әнием: "Колагыгызга тәэбир авазы керсен", - дип, барчабызны уята иде. Һәм без тәрәзә төбенә килеп тезелеп, урам буйлап килүчеләрне күзәтә идек. Бу юлы тәэбир әйтеп килүчеләрне тәрәзә аркылы гына түгел, урамга, капка төбенә чыгып тыңлаучылар да булды. Ә мәчетнең түр ягы да, алгы өлеше дә килүчеләр белән тулы булды.
Тагын бер мәртәбәле вакыйга узды: Гает көнне Олы Әтнә мәчетендә мәҗлес уздырдылар. Авылдашлары Фаил Садыйков корбанга тәкә чалды, намазга йөрүчеләр икенде намазы алдыннан мәчеттә җыелдылар. Икенде намазыннан соң, мәҗлес уздырып, соңыннан ахшам намазы укыдылар. Бу уңайдан Наил хәзрәт: "Бик күркәм, күңелле булды. Элек мәчеттә "Авыз ачтыру"лар узгалады, беренче тапкыр корбан чалып, мәҗлес уздырдык", - диде.
Кыскасы, Корбан Гаете барлык мөселманнарны берләштерә, якынайта, күңелләр дә миһербанлык һәм шәфкать хисләре белән тула. Мәчетләрдә, мәҗлесләрдә исә, бу тагын да ачыграк чалына.
Иң мөһим һәм кызыклы язмаларны Татмедиа Telegram-каналында укыгыз
