Әтнә таңы

“Әти дип әйтергә тилмереп...”

"Сагынганда алыр идем, сулышым белән тартып..." Сәхнәдән яңгыраган моңлы җырны ишетеп, залда утыручы күпләр күзләрендәге яшь тамчыларын сөртте. Бәрәскә авылы мәдәният йортында "Хәтер мәңгелек" исеме астында узган ветераннар советы рәисләренең семинары барышында мондый мизгелләр күп булды. Сугыш чоры балаларының видеопроектор аша әтиләрен сугышка озатканда кичергәннәрен искә алулары гына да ни...

Реклама

"Сагынганда алыр идем, сулышым белән тартып..." Сәхнәдән яңгыраган моңлы җырны ишетеп, залда утыручы күпләр күзләрендәге яшь тамчыларын сөртте.

Бәрәскә авылы мәдәният йортында "Хәтер мәңгелек" исеме астында узган ветераннар советы рәисләренең семинары барышында мондый мизгелләр күп булды. Сугыш чоры балаларының видеопроектор аша әтиләрен сугышка озатканда кичергәннәрен искә алулары гына да ни тора. Ул чакта сабый булганнарның да бүген инде чәчләре көмешләнгән, йөзләрендә - тирән сырлар. Язмышка буйсынып, тормыш йөген җигелеп таручылар шул алар. Бүгенге муллыкка сөенеп яшиләр, биргәненә шөкер кылалар. Сугыш вакытларында кичергәннәрен тагын бер кат йөрәкләре аша үткәреп, ихластан кичерешләре белән уртаклашалар. " Гомер, "әти", диеп әйтергә тилмереп үтте", - дип сөйли Сания апа Гыйззатуллина. Фронтка китер алдыннан әтисе белән соңгы очрашуын да күңел түрендә кадерле ядкарь итеп саклый. Сугыш бетеп, ничә еллар узгач, әтисенең Кызыл Йолдыз ордены белән бүләкләнүе турындагы хәбәрне алуы турында исә горурлык хисләре белән сөйләде ул. Хәбәрсез югалган дип исәпләнгән әтисенең һәлак булган көнен дә әнә шул көнне генә белгәннәр. Ә менә Раушания апа Хамидуллина сабый чагының иң үзәккә үткән ике мизгелен бик ачык хәтерли. "Әниемне ферма мөдире итеп куйдылар. Ул чактагы колхоз рәисенең әнине ачуланып "үзеңне төрмәгә тыгам, дүрт балаңны ачка үтерәм",- дип кычкыруы әле дә колагымда", - ди ул. Әтисе белән бергә хезмәт иткән солдатның кайтып, әтисенең ничек һәлак булуы турында сөйләве - кечкенә кызны тетрәндергән икенче хатирә. Өлкәннәрнең теләге бер - бүтән сугыш кабатланмасын, сабыйлар ятим калмасын. Семинарның төп максаты да әнә шул иде - яшь буында патриотик хисләр тәрбияләү, үткәннәрдән сабак алу. Өлкәннәр белән беррәттән укучы балаларның да биредә булуы шул хакта сөйли. Әлеге семинарның нәкъ менә Бәрәскәдә үтүенең дә үз сәбәбе бар. Җирлекнең ветераннар советы рәисе Сөембикә Садриева сүзләренә караганда, өч авылга 428 пенсионер исәпләнә биредә. Аларның һәрберсен түгәрәк даталары белән котлап, бүләкләр тапшыралар. Семинар барышында да Наил абый Хөсәеновны 75 яшьлек юбилее белән котлап, бүләк тапшырып киттеләр. Бу әлбәттә, җирле хакимиятнең өлкәннәр турында кайгыртучанлыгы, хөрмәте билгесе. Өлкәннәр үзләре дә бик актив биредә. "Сүнмәс йолдызлар" ансамбле оештырып җибәргәннәр, 12 кеше компьютер курсларында белем алган, кышын чаңгыда, җәен велосипедта йөриләр. Шул ук вакытта дини гыйлемгә өйрәнергә дә вакыт табалар. Район ветераннар советының тынгы белмәс җитәкчесе Мингазиз Зиннәтов оештырган бер чарадан да читтә калмыйлар. Дөрестән дә, мондый чаралар яшь буынны тәрбияләүдә зур әһәмияткә ия. Алар киләчәктә дә дәвам итәчәк.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: