Тәмәке тарту тыела

2013 елның 15 ноябреннән Россия Федерациясенең административ кодексындагы үзгәрешләр үз көченә керде.
Бу үзгәрешләр "Гражданнар сәламәтлеген тәмәке төтененнән һәм тәмәке кулланганның зыяныннан саклау" дип аталган Федераль Закон таләпләрен бозган өчен административ җаваплылыкны раслаган. Россия Федерациясенең административ кодексына берничә маддә өстәлгән. Шушы көннән җәмгыять урыннарында, белем бирү, сәламәтлек, мәдәният учреждениеләрендә һәм гражданнар күпчелек булган урыннарда тәмәке тарту тыела. Таләпләр үтәлмәгән очракта саллы гына штрафлар каралган. Бу хакта Әтнә полиция бүлекчәсе башлыгы урынбасары, полиция майоры Илшат Баязитов белән сөйләшәбез.
- Укучыларыбызны әлеге штрафларның күләме белән таныштырып үтсәгез иде
- Бик рәхәтләнеп. 6.23 маддә - яшүсмерне тәмәке тартуга этәргән өчен гражданнарга 1000-2000 сумга кадәр штраф, ә шушы ук эшне әти-әнисе башкарган очракта, аларга 2000-3000 сумга кадәр штраф каралган.
Шулай ук тиешле булмаган урыннарда тәмәке тарткан өчен гражданнарга 500 сумнан 1000 сумга кадәр штраф, ә балалар уйный торган мәйданчыкларда тәмәке тарткан өчен гражданнарга 2000-3000 сумга кадәр штраф каралган.
- Бина һәм объектка оешма җитәкчеләре аерым бүлмә һәм билге дә куярга тиешләр. Куймасалар...
- Әйе, шул ук Федераль Законда төрле таләпләр куелган. Беренчесе-бина һәм объект хуҗаларына тәмәке тарту тыелу билгесен кая һәм ничек урнаштырырга кирәк икәнен анлата. Әгәр дә тикшерү вакытында шушындый билгеләр тиешле итеп урнаштырылмаган булса, вазифалы затларга 10000-20000гә кадәр штраф, ә юридик затларга 30000нән 60000 сумга кадәр штраф каралган.
Икенче таләп-һәрбер бинада, объектта һәм аларның территорияләрендә тәмәке тартучыларга яки саф һавада аерым урын, яки махсус тәмәке тарту өчен аерым бүлмә оештырылырга тиеш. Шушы таләпләр үтәлмәсә, вазифалы затларга 20000-30000 сумга кадәр штраф, ә юридик затларга 50000нән 80000сумга кадәр штраф каралган.
- Бу эшмәкәрләргә дә кагыламы?
- Әлбәттә. Өченче таләп эшмәкәрләргә кагылышлы. Шушы Федераль Закон таләпләрен үтәмәгән очракта 30000нән 40000 сумга кадәр штраф каралган.
- Шулай ук тәмәкегә реклама һәр төрдә тыелган. Яшүсмерләргә тәмәке сату да ...
- Яшүсмерләргә тәмәке саткан өчен 14.53 маддә нигезендә гражданнарга 3000нән 5000 сумга кадәр штраф, вазифаи затларга 30000нән 50000гә кадәр штраф, ә юридик затларга 100000нән 150000сумга кадәр штраф каралган.
Шушы Федераль Закон, беренчедән, яшүсмерләрне тәмәке зыяныннан сакларга, икенчедән, тәмәке тартмаучыларның хокукын сакларга таләп итә.
- Кибет каршында тәмәке тартып торучылар еш күренә
- Искәртеп үтәсе килә: клуб яки кибет каршында тәмәке тартып тору - Россия Федерациясе административ кодексының 6.24 маддәсендә каралган хокук бозуга керә һәм гражданнарга 500дән 1000 сумга кадәр штраф салына.
- Әңгәмәң өчен рәхмәт.

Реклама