Әтнә бакчалары һәм акча

Яңа еллар якынлаша. Күңелле бәйрәм мизгелләре белән беррәттән, кесәгә суга торган яңалыклар да алып килә ул.

Балалар бакчасына йөргән өчен түләү бәясе артуы турында ишетеп беләсез инде. 2014 елда элеккедән күпкә арткан бәяләр өчен кайбер шәһәрләрдә әти-әниләр митингларга чыктылар, имзалар да җыйдылар хәтта. Ул чакта яртысы кире кайтачак дип, тынычландырды хөкүмәт. Кешеләрдә ничектер, әмма яртысы дип үк әйтү бик үк дөреслеккә туры килмидер дип уйлыйм. Алдык без ул акчаны, элеккедән калган икенче балага 50% ташламага өстәлеп 600 сум тирәсе кире кайткандыр. Икесенә бергә 1200 сум булды. Кемгә ничектер, безнең хезмәт хакларына шулай туры килде. Ә аннан соң- иремнең эш урыны булмау сәбапле, бөтенләй дә бетте.

Алдымда ноябрь ае өчен түләү кәгазе. Баланы караган өчен (за содержание) 1803 сум, туклану өчен 411 сум 41 тиен - барысы 2214 сум 41 тиен түләргә диелгән. "Акбарс" банкы түләү өчен 22 сум 14 тиен комиссия тотып калган. Гомумән исәпләгәндә, бер ай өчен 4 яшьлек балага 2236 сум 55 тиен акча түләдем. Ирексездән сорау туа, нәрсә өчен? Безнең Олы Мәңгәр балалар бакчасында балаларның нинди шартларда тәрбияләнүе берәү өчен дә сер түгел.Юк, тәрбиячеләргә карата бер сүзем дә юк. Иң борчыганы - балаларга биредә һава җитми, булганы дымлы. Ә дымлы һаваның бала организмына ничек тәэсир итүе турында әйтеп тә торасы юк. Нәтиҗә - мин акча түли-түли балам сәламәтлегенә зыян китерәм. Монысы, теге баланы караган өчен дип әйтелгән 1803 сумга карата. Әлбәттә, ашатуга карата сүз әйтеп булмый. Йөртмә, диярсез сез. Дәүәни- дәүәти кебек зур байлык юк шул бездә. Димәк, йөртмәсәм үземә өйдә утырырга туры киләчәк. Тик бу хәлдән чыгу юлы түгел инде.

Алга китик. Бакчага түләү бәясе 12% ка арта диләр. Димәк, алда әйтелгән 2214.41 сумның 12%ы 265 сум 73 тиен тирәсе. Бергә кушсак 2480 сум, 14 тиен була.Әле шуңа банк комиссиясен дә кушасы бар. Шунысы кызык, әлеге бәяләргә бәйрәм көннәрендәге яллар керми. Гыйнвар аенда , ачуым килмәгәе, ярты ай ял итсәләр дә, бәя кимемәячәк. Монысы инде өченче елдан бирле шулай.

Бакча безгә бик кирәк. Биредә бала иптәшләре белән аралаша , күп очракта шушында ук теле ачыла, бүтән һөнәрләргә дә өйрәнә.Бакча аша бала дөнья белән таныша. Әти-әниләрнең дә аны мондый мөмкинлектән мәхрүм итәселәре килми. Әмма шартлары булмаган бакчага бөтен уңайлыклары булган бакча бәясен түләү - акчаны җилгә очыруга тиң. Тиешле урындагылар моңа да игътибар итсеннәр иде.