Районга республиканың 5нче районара салым инспекциясе җитәкчесе урынбасары Розалия Шәйхәттарова килде.
- График нигезендә сораулары булучыларны, гадәти кабул итү бу. Эш вакытында килә алмаучылар борчылмасыннар. 25 октябрь көнне Ачык ишекләр көне дә уздырабыз әле, һәркемне кабул итәбез, - диде ул. Әтнә халкының салымны ничек түләве күпләрне кызыксындырадыр. Физик затларга салым түләүнең соңгы көне 5 ноябрь икәнен дә күбебез белә. - Бүгенге көнгә барлык салым түләүчеләрнең яртысыннан артыгы моны башкарды инде. Кызганычка каршы, әлегәчә түләмәүчеләр дә бар шул. Югыйсә үзләре үк оттыралар, - дип уфтана бу уңайдан 5нче районара салым инспекциясенең Әтнә участогы буенча җаваплы хезмәткәре Айрат Сабиров. - Бүгенге көндә кешеләргә шалтыратып, салым түләү вакытының ахырына якынлашып килүе хакында исләренә төшерәбез. Квитанциясе килмәде, диючеләр дә бар. Ул очракта салым бүлегенә барып, аны алырга кирәк. Ә салымны вакытында түләмәсәң пени исәпләнә башлый, - ди Олы Әтнә авыл җирлеге башлыгы урынбасары Миңлегөл Фазлыева. Эш шунда, вакытында түләмәсәң чыгымнарың арта. Әйтик, пеня, дәүләт пошлинасы. . . Суд приставларының да үз штрафлары бар. Халыкның салымны вакытында түләве авыл җирлекләре өчен дә мөһим. Әйтик, физик зат түләгән йорт, җир, хәтта НДФЛ салымы - монысын элекке подоходный белән чагыштырырга була - авыл җирлеге бюджетына күчерелә. Физик затлардан тыш ИПлар, юридик затлар да бар бит әле. Салымны алдар да, кыскасы, һәркем түли. Кем нәрсә белән шөгыльләнә, шул нигездә салымны да билгеләнгән ставкалар буенча түли. Әйтик, ИПларга салымыгызны шул сроккача түләгез, дип хат җибәрмиләр. Алар үзләре киләргә тиеш. Хәтта, җирең өстендә кибет бар икән, бу очракта да үзең килү мәҗбүри.
