Әтнә хастаханәсендәге ветераннар палатасы

Хастаханәдә Бөек Җиңүнең 70 еллыгы уңаеннан "Бердәм Россия" партиясе тарафыннан ветераннар өчен махсус палаталар булдыру турында программа кабул ителгән иде. Әлеге программа узган ел гына тормышка ашырыла башласа да, Әтнә үзәк хастаханәсендә мондый ике палата 2012 елдан бирле эшләп килә. Әлеге палаталарның уңайлыклары турында газетаның узган саннарында язып үткән идек инде. Сугыш инвалидлары, тыл һәм сугыш ветераннары, концлагерь тоткыннары, блокадниклар өчен булдырылган палаталар хирургия һәм терапия бүлекләрендә урнашкан. Ике урынлы мондый палаталарда суыткыч, телевизор, микродулкынлы мич белән беррәттән, якында гына бәдрәф һәм раковина да бар. Моның белән замана кешесен гаҗәпләндереп булмаса да, авырлык белән йөрүче ветераннар өчен бу бик уңайлы. Авыру, җитмәсә яше дә сиксәннең арьягында булган кешегә хастаханә коридорының бер башыннан икенчесенә хәтле бару авыр, билгеле. Ярый да көтеп басып торырга туры килмәсә. Өлкәннәр өчен монысы да бик авыр. Шунда ук көзгеләр урнаштырылган. Инвалидлар өчен тотыну өчен махсус җайланмалар да бар биредә. Палатаның үзендә , шулай ук юыну бүлмәсендә махсус дистанцион режимда эшләүче төймә кнопкалар булдырылган.. Авыраеп киткәндә, яисә берәр төрле ярдәм кирәк булган очракта ветеран һәрвакыт шул төймәгә басып шәфкать туташын чакырта ала. Быел исә ветераннар өчен тагын бер уңайлык булдырылган. "Бердәм Россия" партиясе депутаты Илдар Гыйльметдинов тырышлыгы белән әлеге палаталарның терапия бүлегендә урнашканына душ кабинасы да куелган. Димәк, ветеран биредә җаны теләгән вакытта юынып та чыга ала. Сәламәтлеге рөхсәт итсә, билгеле. " Хастаханәдә яткан кебек тә булмадым, рәхәтләнеп ял да иттем, дәваландым да ", - ди хирургия бүлегендәге шундый палатада ятучы Шәрип абый Зарипов. Ул үзе 1932 елгы, тыл ветераны. Бирегә Бәрәзә авылыннан килгән, ун көнлек дәвалану курсы үткән. Палатаның уңайлыклары турында сөйләп туя алмый. " Яткан урын-җирләребез чиста, йомшак, нәкъ өйдәге кебек. Бәдрәф якында булгач, бигрәк тә рәхәт",-ди ул. Рәхәт булмый, хастаханә тарафыннан биредә нәкъ өйдәге кебек шартлар тудырылган. Аерым савыт саба, тәрәзә төбендә чәчәк атып утыручы гөлләр... Шуның өстенә һәрчак ярдәмгә әзер шәфкать туташлары. Сугышның бар авырлыгын үз җилкәләрендә татыган ветераннарга карата олы игътибарның бер өлеше бу. Һәм бу киләчәктә дә дәвам итәр дип өметләник. Район хастаханәсенең баш табибы Азат Гарипов сүзләренә караганда узган 2014 елда биредә 160 сугыш һәм тыл ветераны дәвалану узган. Агымдагы елның 3 аена исә андыйлар саны 23.