Әтнә оныгы Таһир Насыйбуллин Кытайга ник киткән?

Мөндеш егете Азат Насыйбуллин белән Күшәр кызы Миләүшә Насыйбуллинаның улы Таһир Насыйбуллин 6 март көнне Кытайга китте.

Ник китте? Юллама белән 2 елга Кытай илчелегендә тәрҗемә белән эшләп, Кытай балаларына тел белемен бирер өчен. Таһир Азат улының 8 тел белүен бер язган идем. Әтнә оныгы Кытай телен дә камил белә, ул аңа Мәскәүдә укыганда өйрәнә. "Иң авыр тел- Кытай теле, аннан кала гарәп теле", - дип әйтә иде КДУда гарәп теленнән белем биргән укытучым Җәмил абый Зәйнуллин. Таһирның тырышлыгын күрсәтәсем килгәнгә язуым. Ә ул бүген әнә шул тел хуҗалары янәшәсендә йөри.

Һәм без аның белән элемтәгә кердек. Тәэсирләре белән уртаклашуын үтендек. Ят, күз күрмәгән җир бит. Безгә бар да кызык.

- Мәскәүдән Гонконг шәһәренә 11 сәгать самолетта очтым. Шеньчжень шәһәренә метрода килдем. Беренче эшем итеп Шеньчжень шәһәренең 1996 елда төзелгән мәчетенә кереп намаз укыдым. Ул мәчетнең матурлыгын сурәтләп бетерергә сүзләр җитмәс. Миңа кытайлар шаккатып карыйлар, озын, сакаллы европалыны бөтенләй күргәннәре юк. Һәрьяктан фотога төшерәләр. Халык бик ачык. Алар белән инглиз, кытай телендә аралашам. Кытайның миңа ошамаган ягы- ризыклары бик ачы (острый). Ә болай якыннарымның, җитәкчелекнең ышанычын аклап кайтырмын дип уйлыйм. Әтнәләргә бик күп сәлам җибәрәм...- диде ТаҺир Насыйбуллин.

Реклама

" Мин бераз гына киләчәктә! Кытайның Гонконг шәһәренә барып төшкәч шулай тоелды. Вакыт монда бездәгедән 5 сәгать алда. Температура 25 градус җылы",- дип тә өстәде Әтнә егете.

Без Сезгә Кытай яңалыкларын, Таһирның фикерләрен җиткереп барырга тырышырбыз. Ә әлегә фотосурәтләр карагыз.

Сүрия Мингатина