Әтнәдә партия эчендә алдан тавыш биреп сайлаулар узды

Олы Мәңгәр авылы мәдәният йортында партия эчендә алдан тавыш биреп сайлаулар узды. Әлеге сайлауларда "Бердәм Россия" сәяси партиясе әгъзалары катнашты. Сайлаучылар иң элек теркәлү үттеләр. Аларга әлеге сайлаулар өчен махсус эшләнгән белешмәлекләр тапшырылды. Әлеге белешмәлектә партия эчендә алдан тавыш бирүдә катнашучы кандидатларның фотолары белән беррәттән, алар турында кыскача мәгълүмат та язылган. Сайлаучылар алдында район советы рәисе урынбасары Айрат Каюмов чыгыш ясап, әлеге сайлаулар турында кыскача аңлатма бирде. Шунысын да әйтергә кирәк, мондый сайлаулар 12 авыл җирлегендә дә узып, аларда 100гә якын кеше депутат булып сайланачак. Олы Мәңгәр җирлегендә исә барысы 15 кандидат тәкъдим ителгән. Алар барысы да сайлаучыларга яхшы таныш, шушы җирлектә яшәүчеләр. Кандидатлар арасыннан өчесе сайлаучыларга үзләренең сайлау программаларын тәкъдим итте. Авыл җирлеге ветераннар советы рәисе Хәлимә Закирова үзенең чыгышында өлкәннәргә карата лаеклы игътибарны арттыру, шулай ук яшьләргә патриотик тәрбия бирүдә өлкәннәр тәҗрибәсен файдалану турында сөйләсә, Олы Мәңгәр урта мәктәбе директоры урынбасары Рәзинә Сабирова укытучы буларак, сайланган очракта, яшь буынны шәхес итеп тәрбияләү, патриотик тәрбия проблемаларына зур игътибар бирәчәгенә басым ясады. Авыл җирлеге рәисе Вазих Хисматуллин үз чыгышында авыл халкының яшәү шартларын яхшырту, юл, су мәсьәләләренә, шулай ук авыл мөхтәсибәтенең эшчәнлеген торгызуга тукталды. Билгеле, әлеге эшләрне күмәк хуҗалык ярдәменнән башка башкарып чыгу мөмкин түгел. Җирлек башлыгының төп максаты да күмәк хуҗалык җитәкчелеге белән ныклы элемтәдә тору, авыл тормышын җанландыруга өлкәннәрне дә, яшьләрне дә күбрәк җәлеп итү. Әлеге сайлауларның хисап комиссиясенең эшче төркем рәисе Гөлназ Мусина сайлау чылар алдында чыгыш ясап, тавыш бирү тәртибен аңлатып узды. Шунысын да әйтергә кирәк, яшерен тавыш бирү бюллетененең формасы һәм тексты Партия эчендә тавыш бирүне үткәрү буенча Оештыру комитеты карары белән расланган. Бюллетень рус һәм татар телләрендә. Әлеге бюллетеньнәр партиянең җирле башкарма комитеты тарафыннан әзерләнеп, акт буенча эшче төркемгә тапшырылган. "Сайлаучы бюллетеньгә кертелгән партия эчендә алдан тавыш бирүдә катнашучы теләсә кайсы кандидатны хуплап тавыш бирергә хокуклы. Ләкин сайлап алынган кандидатлар саны муниципаль берәмлекләрнең вәкиллекле органнарында булырга тиешле мандатлар саныннан артык була алмый, ягъни уннан артык түгел", - диде ул. Әлеге сайлаулар авыл җирлекләре арасында иң беренчесе иде.

Беренче коймак төерле була дисәләр дә, Олы Мәңгәрдә әлеге чараны оештыруга җитди игътибар бирелгән. Бу исә авыл җирлеге башкарма комитетының намуслы һәм тырыш хезмәте нәтиҗәсе