Тиздән язгы кыр эшләре старт алачак. Игенче өчен мәшәкатьле, гаять җаваплы чор башлана. Бу уңайдан районның авыл хуҗалыгы һәм азык-төлек идарәсе белгечләре белән сөйләштек. Фикерләре бердәй, язгы кыр эшләрен уңышлы башкару өчен 4 алшартның төгәл үтәлүе кирәк. - Иң мөһим шарт: кадрлар белән тәэмин ителеш уңай хәл ителде. Ә эшне...
Тиздән язгы кыр эшләре старт алачак. Игенче өчен мәшәкатьле, гаять җаваплы чор башлана.
Бу уңайдан районның авыл хуҗалыгы һәм азык-төлек идарәсе белгечләре белән сөйләштек. Фикерләре бердәй, язгы кыр эшләрен уңышлы башкару өчен 4 алшартның төгәл үтәлүе кирәк.
- Иң мөһим шарт: кадрлар белән тәэмин ителеш уңай хәл ителде. Ә эшне ике сменалы итеп оештыру отышлы.Хәер, бу яктан бер проблема да булмас, - ди механикалаштыру буенча консультант Фидаил Сөнгатов.
Икенче шарт белән дә ул таныштырды. Һәрбер техника һәм агрегат тиешенчә комплектланган. Бүгеннән үк басуга чыгып китәргә әзер. Бу хакта "Интертат.ру" электрон газетасы да язып чыкты. Татарстанның авыл хуҗалыгы министрлыгыннан алган мәгълүматларга таянып, "Авыл хуҗалыгы техникасын язгы чәчүгә әзерләү буенча иң алдынгы районнар - Әтнә, Актаныш, Балтач, Буа, Чүпрәле, Кайбыч, Нурлат, Зәй һәм Сарман", - дип билгели.
Янә мөһим шарт - чималның тиешле дәрәҗәдә булуы кирәк. Орлыкчылык инспекциясе белгечләре: "Орлыклар җитәрлек, тишелешләре дә
әйбәт", - диделәр.
Хәзер орлыкны кирәкле матдәләр белән туендырмасаң, яхшы уңышка өмет итә алмыйсың. Язгы кыр эшләренә керешүнең дүртенче шарты бу. Район агрохимигы Алмаз Фазылҗанов: "Ашлама да җитәрлек", - ди.
Дөрес, әле карның эреп, җирнең өлгерүе кирәк. Шуңа күрә вакыт бар: без әзер дип тик ятарга түгел, техника-агрегатларны тагын бер кат күздән кичерү мөһим.
Яңа төр агрегатларга аерым игътибар булырга тиеш. Әнә бит, Фидаил Сөнгатов та заман агрегатларын куанып искә ала:
- Басу-кырларда "Турбосим", "Пронто", "Агротур", "Кузбасс" чәчү комплекслары эшләячәк. Ә "ХОРШ"лар аерым урын тоталар. Әлбәттә, яңа төр "СЗП"лар да бар, - ди.
Иң мөһим һәм кызыклы язмаларны Татмедиа Telegram-каналында укыгыз
