Яздым да "Тьфу-тьфу" дип куйдым, күз тимәсен тагын. Соңгы елның грипплары да куркынычка әйләнде, әллә нинди исемнәр белән аталды, я кошныкы, я терлекнеке... үлемгә китерә дип тә куркыттылар. Чынлап та кайбер елгы гриппны үзебез дә авыр кичердек, температураны төшерә алмый интектек.
Быелгысы нинди дә, ничек үтәр?- грипп турында сүз чыкса, әнә шулай сөйләшә халык. Аллам сакласын, сарымсак, суган белән генә котылып булырмы? Гыйнвар аен шулай шөбһәләнеп үткәрдек. Февраль дә бетеп бара, ә без, Аллага шөкер, исән-имин. Берүк шулай була күрсен. Бәлки Әтнәне читләтеп үтәр. Районыбыз больницасының баш табибы Азат Харис улы Гарипов та моңа өметләнә. "Аллага шөкер, районыбызда грипп белән авыручылар юк. Соңгы 5-6 елда, гомумән, бу чир белән авыручылар сирәгәя. Бу вакциналарның файдасы, дип саныйм. Быел да октябрь-ноябрь айларында гриппка каршы вакцина ясалып бетте. Мәктәпләрне-бакчаларны контрольдә тотабыз. Грипп юк. Ә менә ОРВИ белән авыручылар күренгәли. Соңгы бер-ике көндә артты. Олылар арасында юк дисәң дә була, менә мәктәпләрдә, балалар бакчаларында 1-2,1-2 күренә", - ди баш табиб.
Вирус инфекциясенең һава белән таралуын исәпкә алсак, бәлки кемдер читтән "ияртеп" кайткандыр. Ахыры яхшы булсын, ди безнең татар халкы.
Аллаһы Тәгалә, сакланганны саклармын, дигән. Сакланыйк. Суган, сарымсак, туңдыргычларда кулланылмыйча яткан җиләк-җимешләрне чыгарыйк. Кулланыйк, "Кибеттәге лимонга караганда туңдырылган карлыган, кызыл карлыган, кура җиләге, мүк җиләкләрендә "С" витамины күбрәк", дип кисәтә табиблар. "С" витаминының организмда бер генә көнлек запасы булуын да, гөлҗимеш җимешен дә, киптергән юкә чәчәге, карлыган яфракларын да файдаланыйк. Сәламәт яшәү рәвеше алып барсак та начар булмас.
Ә инде авырый калсак, аерырга өйрәник: грипп югары температура белән башлана, тән температурагыз беренче көнне үк 38-39 икән, урынга ятыгыз, бу грипп. Ә инде 37-37,3 тирәсендә булып, борын тартып, мышык-мышык йөрсәгез, бу - ОРВИ! Ике очракта да дәваланырга кирәк, табибка мөрәҗәгать итегез. Үз белдегең белән антибиотиклар кулланырга да кирәкми. Авырмыйк!
Сүрия МИНГАТИНА
Иң мөһим һәм кызыклы язмаларны Татмедиа Telegram-каналында укыгыз
