Әтнә укучылары ярышка китте

Республикада мәктәп укучылары арасында янгын сүндерүчеләр һөнәренең үзенчәлекләрен күзаллау буенча ярышлар уза. Әлеге ярышларда безнең Олы Әтнә урта мәктәбеннән 8 кешелек команда да көч сынашачак. 4 егет һәм 4 кыздан торган команда Биектауда узган ярышта үзләрен янгын сүндерүчеләр урынына куеп караячаклар. Республикакүләм ярышта районыбыз укучыларының беренче тапкыр гына катнашулары. "Куркынычсызлык мәктәбе" дип исемләнгән ярыш 16сыннан башланып, 19 сентябрьгә кадәр дәвам итә. Биредә укучылар палаткаларда яшәп, үзләрен һәр яклап сынаячаклар. Уңышлар юлдаш булсын аларга.