Икесе дә республика күрсәткечләреннән югары. Шунысы куанычлы, сабыйлар үлеме юк. Җомга көнне район үзәк больницасында узган медицина хезмәткәрләренең утырышында ачыктан-ачык сөйләшенде бу хакта.
Сөйләшеп кенә дә калмадылар, баш табиб урынбасарлары Илнур Латыйпов, Дамир Закиров, балалар табибы Эльвира Даутованың алдан әзерләнгән чыгышларын тыңлап, Казаннан кайткан вәкил, шәһәр сәламәтлек саклау бүлеге җитәкчесе урынбасары Гөлнара Гайфуллина, район башкарма комитеты җитәкчесе Габделнур Мәрдәнов катнашында узган елгы эшләренә нәтиҗә ясадылар. Үлемгә китергән авыруларның 40,3 проценты кан әйләнеше системасы авыруларына туры килә. Инфаркт, инсульттан вафат булучылар да җитәрлек. Узган ел инсульт булган 31 кеше махсус ачылган үзәкләргә илтелгән. Үлемгә китергән икенче төр - яман шеш авырулары, 100 кешегә исәпләсәк, 135,3 туры килә. Бу алдагы елга караганда 20 процентка артып, үлемгә китергән авыруларның 7,3 процентын тәшкил итә. Өченче урында - ашкайнату-эчәк авыртулары. 2012 ел белән чагыштырганда эшкә яраклы бер кеше артыграк үлгән. Ә иң борчыганы, "Башка авыруларны башлангыч чорында ачыклый алсак та, яман шеш авыруларын киметә алмыйбыз", - ди баш табиб. Азат Харис улы әйткәнчә, табибларның эшләп җиткермәве дә бардыр, авыл кешесенең соң чиккә җиткәч кенә больницага килеп егылуы да статистиканы үзгәртәдер. Узган ел табиблар 46 яман шеш очрагын ачыклаганнар. Алдагы елда 44 булган. Яңа барлыкка килгән авыру күп очракта үпкә, ашказаны, күкрәктә табылган. Узган ел ахырына яман шеш белән учетта торучылар саны 236га җиткән. Шуның 65,2 процентында авыру башланган чорында, I-II стадиядә ачыкланган. Табибларның тырышулары эзсез үтмәгән, авыруның азуы аз булса да, өч елга 1,3 процентка кимегән.
Диспансерлаштыру барышында да 884 авырту ачыкланган, шуның 63,6 проценты кан әйләнеше авыруларына туры килә, әлеге чараның ни дәрәҗә мөһимлеген анлагансыздыр. Туберкулез да, ВИЧ-инфекциянең дә яңа очраклары теркәлмәгән.
Никадәр саннардан качарга тырышсам да, елга нәтиҗә ясаганда алар үзләре өчен үзләре сөйлиләр. Районның 103732 кешесе поликлиникага, табибларга күренергә килгән. "Ашыгыч ярдәм"нең вакытында хезмәт күрсәтүе дә 98 процент белән бәяләнә. 6814 кеше флюрография үткән. Районыбызның 35 кешесенә югары технологияле медицина ярдәме күрсәтелгән (Казанда суставка, йөрәккә операцияләр ясау дип аңларга кирәк) Башкарылган хезмәт зур, әнә шул эшләргә дәүләт тарафыннан 77218,9 мең сум акча бирелгән һәм бу бер кешегә - 5,8 мең сум туры килә.
Тулырак язманы "Әтнә таңы" газетасы битләреннән укыгыз
Иң мөһим һәм кызыклы язмаларны Татмедиа Telegram-каналында укыгыз
