"Авыру белән кайткан машина больница ишек алдына керә алмый"- ди район үзәк больницасының баш табибы Азат Гарипов. Ничек инде, дип гаҗәпләнәсезме? Үзем дә иң элек шулай уйлап өлгердем. Аннан соң гына, больницага күренергә килгән кешеләрнең юл буе тезелеп киткән машиналары күз алдыма килде. "Юл буенда гына булса икән, больницага керә...
"Авыру белән кайткан машина больница ишек алдына керә алмый"- ди район үзәк больницасының баш табибы Азат Гарипов.
Ничек инде, дип гаҗәпләнәсезме? Үзем дә иң элек шулай уйлап өлгердем. Аннан соң гына, больницага күренергә килгән кешеләрнең юл буе тезелеп киткән машиналары күз алдыма килде. "Юл буенда гына булса икән, больницага керә торган капкаларның алдына кадәр килеп туктыйлар. "Ашыгыч ярдәм" машиналары авыру белән кайта, капка алдына куйган машинаның шоферын эзләргә, аның чыкканын көтәргә мәҗбүрләр. Авыр хәлдәге кешенең гомерен күп очракта минутлар хәл итә,- ди баш табиб. - Республика, район җитәкчелеге, сәламәтлек саклау министрлыгы халыкның сәламәтлеген ничек кайгыртканы күз алдыбызда. Соңгы елларда гына үзебезнең больницада да күп эшләнде. Ашыгыч ярдәм күрсәтү бүлегенең ничек зурайтылганы, яңа төр җиһазлар белән баетылганын да беләсез. Тышкы ягы да күтәртелеп, авыруга ярдәм күрсәтә торган машиналар "Ашыгыч ярдәм" ишек төбенә кадәр килеп туктый торган иттек. Шлагбаум куйдык. Машина шоферлары пультка басып, аның белән үзләре идарә итәләр. Алай гына да түгел, безнең ярдәм күрсәтү машиналарына яңа төр күзәтү системасы урнаштырылган. Аларның һәркайсын РКБдан күзәтеп торалар, берсе дә арлы-бирле йөрергә, авыру белән кайтып капкадан керә алмыйча торырга тиеш түгелләр. Без тиз һәм сыйфатлы итеп эшләргә тиеш, тырышабыз. Тоткарлык булмасын дип тиешле оешмалар белән сөйләшеп, "Машиналар куймаска", дигән билге (знак) дә куйдырттык. Шоферлар белә, тиешле кагыйдә бозылса, 1500 сум күләмендә штраф салына. Башта кисәттек. Тыңламаучыларга полиция хезмәткәрләрен чакыртып, чара күрергә дә туры килде. Күрәсең, акчалары күптер инде. Моннан соң да шулай эшләргә мәҗбүрбез",- ди Азат Харис улы.
Тик әлегә кадәр халык белән аңлашып эшләгән табибның халыкны да кисәтәсе килә. Тыңлыйк. Авырган чакта болай да чыгым күп була. Керү юлына машиналар куймагыз! Район җитәкчелеге нәкъ менә шуны истә тотып юл кырыйларын киңәйтте дә инде.
"20дән артык кешегә штраф салдык инде. Машина йөртүчеләр билгеләргә игътибарлырак булсыннан иде",- ди ЮХИДИ инспекторы Фәнил Муллагалиев.
Иң мөһим һәм кызыклы язмаларны Татмедиа Telegram-каналында укыгыз
