Әтнәдә дә “Бердәм стандартлар гамәлгә керер”

Олы кунакны район советы җитәкчесе урынбасары Айрат Каюмов, мәгариф бүлеге җитәкчесе Гөлшат Закирова, "Бердәм Россия" партиясенең Әтнә башкарма комитеты җитәкчесе Равилә Мөхәммәтгалиева озатып йөрде.

Күңгәр мәктәбенең актлар залында узган очрашуны Айрат Каюмов депутатны:

- Республиканың иң яхшы авыл мәктәбе статусын алган иде, - дип таныштырудан башлады.

Россия Дәүләт Думасы депутаты мәктәптә күргәннәрдән канәгать калуын җиткерде һәм ил күләмендәге гомуми белем бирү проблемалары турында сөйләде. Беренче чиратта, Россиядә бердәм стандартлар булсын иде, дигән теләктә ул. "Парламентта шул юнәлештә эшчәнлек бара", - дип ассызыклады. Дөрестән дә, илдә 12-13 төрле стандарт эшли, кайсы-берсе бер-берсенә каршылык та тудыра. Депутатның: "Бәлки шулар нигезендә уртак база төзергәдер", - диюен аңларга була. Хәзер яңа стандартлар 5 сыйныфта керә. Аңлашылганча, депутатлар аны 2020 елдан башлап тулысынча гамәлгә кертергә уйлыйлар. Якындагы берничә ел эчендә балалар бакчасы төзүне төгәлләргә мөмкиннәр. Әмма ясли проблемасы баш калкыта. Депутатның фикере шундый - бала 3 яшькәчә әнисе белән бергә өйдә булырга тиеш. Депутатлар бу мәсьәләне дә гамәлгә кертергә уйлыйлар. Мәктәптән соң югары уку йортында белем алу буенча да сөйләде. Хәзер студентларны максатчан җыю гамәлгә кереп бара. Ул килешү нигезендә башкарыла.

"Хәзер балаларга уку йөкләмәсе (нагрузка) артты... Мин үзем кечкенә сыйныфларда балаларны шимбә көнне укытмаска кирәк, дип саныйм", - диде. Балалар әти-әни белән күбрәк аралашсыннар, дигән фикердә. Көн таләбе нигезендә төзелгән бакчаларның җитәрлек булуын, хәзер яңа мәктәпләр төзү проблемасы баш калкытуын да билгеләде.

Сорауларга да җавап бирде. Күңгәр мәктәбе директорын "Авыл мәктәбе", "Аз комплектлы мәктәп" программалары булмау борчый. "Кышкы лагерь" ял итү программасының авылда бик мөһим булмавын ассызыклап, "Аңа дигән акчаларны балаларны тукландыруга тотып булмасмы?" - диде. Профсоюз җитәкчесен укытучының яшь бала белән 3 яшькәчә өйдә утырган вакыты "Выслуга" стажына кермәве борчый. Депутат исә: "Боларның һәммәсе дә парламентта каралачак", - диде. Янә бер сорауга җавап итеп, яшь белгечләргә кагылышлы махсус программаларны бармакларын бөгеп санады. Бездә шундый 4 программа эшләп тора.

Мондый очрашулар нәтиҗәсендә укытучыларның проблемаларын күзаллап, ярдәм итәргә була дип саный. Шөкер, барыбыз да шул фикердә.