Әтнә таңы

Әтнәдә әфганчылар концерты

"Иснәмәсен алар башка дары..." - Әтнә дәүләт драма театры бинасында әфганчылар көнен билгеләп, хәтер яңарттык. Ике сәгать дәвамында барган бу очрашудан һәркем шигъри юллар авторы Равил Садриевка кушылып, "Исән булсыннар, әниләргә Ходай сабырлык бирсен, башка мондый хәсрәтләр күрергә язмасын", дигән теләктә калды.

Реклама

Ел саен искә ала идек бу көнне, гадәткә кергән иде. Тик әле мондый чараны күргән булмады. Соңыннан сәхнәгә әфганчыларга рәхмәт әйтергә чыккан мәдәният бүлеге мөдире Азат Хәйретдинов та дулкынлануын баса алмыйча: "Бүген эчендә җаны булган кеше тыныч кына карый, тыңлый алмагандыр. Еладык та, шатландык та... баш иям Әфганстанда балаларын югалткан аналар алдында, баш иям улларын сабыр гына көтә алган әти-әниләр алдында, баш иям Әфганчылар Сезнең алда... Бүгенге очрашуның "изюминка"сы менә шушы әфганчы ир-егетләрдән оешкан ансамбль иде. Китек-котыклары булса, үпкәләмәссез, 50гә җиткән ир-егетләрдән берничә көн эчендә генә ансамбль оештыру җиңел түгел. Һәркайсының гаиләсе, эше бар. Элек уйнаганнарын искә төшерергә дә вакыт кирәк булды. Ә алар булмый димәде, тырыштылар. Рәхмәт..." - әнә шулай ансамбльдә чыгыш ясаган Илнур Зарипов (синтезатор), Илдар Шакиров (гитара), Наил Әскаров (ударник), Илдар Сираҗиев(гитара), Фарис Биккинин (баян), Ирек Әскаров (баян), җырчылар Раил Касыймов, Илфар Галләмовка, һәркайсына, исемләп рәхмәт әйтеп, алкышлар астында Мактау грамотасы тапшырып чыкты.
...Сәхнәдә Нурзыя апа Хәйруллинаның: "Бу көн безнең өчен бәйрәм була алмады" , дип күз яшьләренә буылганда, бөтен зал күз яшьләрен сөртте. Улы Зөлфәт турындагы хатирәләр белән уртаклашуын да тын да алмый тыңладык. Табут кайтып, зиратка алып баруларын искә алганда, кемнәрнеңдер: "Я, Раббым, сабырлык бир бу анага!" дигән тавышлары да ишетелде. Берүк фәрештәләрнең "Амин", дип торган вакытларына туры килгән булсын иде. 30 еллап җан ачысы белән яшәгән ананың:" Гаеп итмәгез инде, матур итеп сөйли белмим, ничек бар, шулай әйттем. Бу әчене берәүгә дә күрсәтмәсен Ходаем", дип үзен җиңеп сөйли алуын да алкышладык, аның янәшәсендә чыгыш ясаган солдат аналары Фәния, Хәлимә апаларны да аягурә басып,чәчәкләр бүләк итеп, күз яшьләрен сөртә-сөртә, кул чабып озаттык.
Русча, татарча җырлаган ир-егетләрне дә алкышладык. Җитәкчеләре Ленар Кәбиров :
- Безгә һәр нәрсә сынау аша бирелә, бу да сезнең алда, залда утырган мәктәп балалары алдында сыналу...- дип ихтирамын җиткерде. Әфганчылар турында китап чыгарачакларын хәбәр итеп, әлегә әфганчыларга бастырылган кечкенә китапчык белән гвоздика чәчәкләре бүләк итте. Үзләре тарафыннан тыныч тормышта никадәр эшләнгәнлекне бәян итте. Алда эшләнәсе эшлэренэ дэ тукталды.
Әфганчыларны котларга сәхнәгә менгән, район башлыгы исеменнән әфганчыларга "Рәхмәт хаты", сертификат тапшырган район советы рәисе урынбасары Айрат Каюмовны да алкышлар белән хупладык. Татарстанның Арча һәм Әтнә буенча хәрби комиссары Алмаз Борһанов ир-егетләрне котлап, беррәттән аларны башлангыч хәрби хәзерлек белемнәренә өйрәткән мәктәп укытучыларына бүләк биргәндә дә, республика күләмендә "Батырлык урыны- Әфганстан" дип исемләнгән балалар иҗатына нәтиҗә ясалып, җиңүчеләр арасында Күңгәр мәктәбе укучысы Руслан Гаделшин һәм Күңгәр китапханәсе булуын белгәч тә кул чаптык. Әлеге җиңүчеләр белән бергә Ленар Кәбировка генерал-майор С.Н.Погодин исеменнән Диплом тапшырылганда да, Мәгариф бүлеге җитәкчесе Гөлүсә Рәхимҗанова патриотик айлык игълан итүләрен әйтеп, җиңүче Олы Әтнә, Түбән Көек, Комыргуҗа мәктәпләренә Мактау кәгазьләре тапшырганда да шатлыкның чиге булмады.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: