Әтнәдә “Игелекле эшләр эстафетасы“ үтте

"Президент белән бергә" татар иҗтимагый хәрәкәте активистлары "Игелекле эшләр эстафетасы" акциясен башлап җибәрделәр.

Әлеге акциянең максаты - социаль мәсьәләләрне чишүдә һәм гражданлык активлыгын арттыруда ирекле ярдәм күрсәтү идеясен җәелдерү. Аның кысаларында хәйрия һәм экология белән бәйле чаралар үткәрү, тирә- як табигатьне саклау һәм ямьләндерү акцияләре, шулай ук балаларга, өлкән һәм ялгыз кешеләргә ярдәм күрсәтү кебек игелекле эшләр башкару күздә тотыла. .

Реклама

Мондый чаралар безнең районда да киң колач алды. "Изгелек" халыкка социаль хезмәт күрсәтү үзәгендә ятим, авыр хәлле, ярдәмгә мохтаҗ гаиләләрдә тәрбияләнүче балаларның "Дуслык" клубы эшләп килә. Шушы клубка йөрүче балалар белән бергәләп район үзәгендә өлкән кешеләргә 50 Георгий лентасы өләшенгән. " Әлеге акциягә кушылып авыр хәлле гаиләләрдә тәрбияләнүче укучы балаларга үзебезнең үзәктә җыелган әдәби китаплар тапшырдык", - ди "Изгелек" үзәгенең гаилә һәм балаларга социаль ярдәм күрсәтү бүлекчәсе мөдире Гүзәлия Садретдинова.

Тәрбия эшләре буенча мәгариф бүлеге башлыгы урынбасары Миләүшә Сафина сүзләренә караганда, әлеге акция кысаларында район мәктәпләрендә дә актив эш алып барыла. Олы Әтнә урта мәктәбендә мәсәлән, бу уңайдан төрле чаралар үткәрелгән. " Яхшы сүз көне" девизы астында сыйныф сәгатьләре, "Георгий лентасы - дан билгесе"тематик дәресе, гасырлар буена сыналган милләтләр дуслыгына багышлап әзерләнгән"Дуслык өчен киртәләр юк" исеме астында үткән тәрбия сәгатьләре әнә шундыйлардан. "Тормыш изгелекләр эшләү өчен бирелгән" девизы белән укучылар ялгыз яшәүче өлкән кешеләрдә һәм сугыш ветераннары торган йортларда булганнар. Алар хуҗалыкта булышканнар, өлкәннәрнең йорт тирәләрен җыештырырга ярдәм иткәннәр.

Комыргуҗа мәктәбендә исә укучылар шушы акция белән бәйләп авылның һәйкәл тирәләрен чистартканнар, иске китапларны яңартканнар. Районның күп кенә мәктәпләрендә ветераннар белән очрашулар оештырылган. "Җиңү хаты" исеме астында укучылар үткәннәргә, Бөек Ватан сугышының бар афәтен кичергән туганнарына, гаилә әгъзаларына хат язу бәйгесендә катнашканнар. Болар барысы да яшь буында үткәннәргә ихтирам тәрбияләү, буыннар чылбырын тагын да ныгытуны күз алдында тотып үткәрелә. Яшьләребезне рухи яктан үстерү, патриотик хисләр тәрбияләүдә" Игелекле эшләр эстафетасы" акциясе кысаларында үткән мондый чаралар, һичшиксез, олы әһәмияткә ия.

Алдан язып үткәнебезчә, "Президент белән бергә" иҗтимагый хәрәкәте татарстанлыларны берләштерүне һәм Президентыбыз Рөстәм Миннехановның башлангычы һәм инициативасы белән кабул ителгән махсус программаларны тормышка ашыруда конкрет чаралар күрү, республика үсешенә һәркемнең кулыннан килгәнчә үзеннән өлеш кертүен бурыч итеп куя. " Игелекле эшләр эстафетасы" - әнә шул берләшүнең, республикабызга һәм анда яшәүче халыкка карата битараф булмауның бер чагылышы.