Әтнәдә – инвалидлар ункөнлеге

Инвалидлар ункөнлегенә аяк бастык. Халыкны социаль яклау бүлеге җитәкчесе Әминә Галиева белән шул хакта сөйләштек.

• Бүгенге көндә райондагы инвалид-балалар исемлеген ачыклыйбыз, - дип башлады сүзен бүлек җитәкчесе.

9 декабрь көнне Хәйрия марафоны уза. Бу уңайдан мохтаҗ инвалидларны игътибарсыз калдырмаска вәгъдә итәләр. Бездә инвалид-балалар - 58, I төркем инвалидлар саны - 173, II төркемнәр - 1214 һәм III төркем инвалидлар - 502. Районда барысы 1947 кеше инвалид статусын йөртә. Аларга ярдәм йөзеннән оешма-предприятиеләр махсус ачылган Хәйрия фондына әле дә акча күчерәләр. Әлбәттә, беренче чиратта, авыру дәрәҗәсенә бәйле рәвештә инвалид-балаларга ярдәм ителә. Анысын табиблар, медицина өлкәсендәге белгечләр составындагы махсус комиссия билгели.

• Ярдәм сораган инвалидлар мөрәҗәгатеәле дә керә. Конкрет ярдәмне мохтаҗ булган һәркем тоячак, - диде Әминә Галиева.

Реклама

Ә без инвалидларга тиешенчә ярдәм итәбезме? Бу хакта халыктан сораштым. Төрле фикер бар, пессимистлар күбрәк. Әйтик,Түбән Бәрәскәдән Зөлфия ханым:

• Инвалидлар язмышына халык битарафбезнең, - диде.

Олы Мәңгәрдән Гөлсинә ханым:

• Бер генә көнне булса да, инвалидларга хезмәт күрсәтүне бушлай яки ташламалы итәргә кирәк, - дигән фикердә.

Шәхси кибет хуҗалары серле генә елмаеп:

• Аренда бәяләрен төшерсәләр, без инвалидлар өчен бәяләрне сизелерлек дәрәҗәдә киметергә әзер, - диделәр.

Ә менә кайдан икәнен әйтергә теләмәгән Сания апа:

• Халыкның битарафлыгы турында дөрес әйткәннәр. Сәбәбе бар. Чөнки Хәйрия марафоны диюгә, күз алдына типсә тимер өзәрдәй инвалидлар килә. Үзеңне әнә шул синнән ун тапкыр күбрәк акча эшләүче инвалидка ярдәм иткәндәй хис итәсең... - диде.

Башка елларны бер көнне булса да инвалидның чәчен бушка алалар иде. Чәчтарашханәләрне йөреп чыктым: быел бушка булмас, ахыры. Хәзер бер генә теләк: пакет белән күчтәнәч биргәндә (анысы булыр инде, шәт!) "җылы сүзләр"ен кызганмасыннар иде. Инвалидлар аңа бик мохтаҗ.Шөкер, мәдәни чаралар уза. Яңа Әтнәдә Параолимпиада чемпионы Ирина Полякова белән очрашу уза. Авыл клубларында, мәдәният йортларында махсус чаралар көтелә.