Әтнәдә исерек килеш руль артына утыручылар саны арткан

Узган 2013 елда Әтнә районы юлларында башка елларга караганда, чагыштырмача тыныч булды дип әйтергә була.

Ел дәвамында юллардагы борылмалар һәм чокырлар кебек, күңелсез вакыйгалар да күп булды. Барысы бергә 9 юл һаләкәте теркәлде, 1 кеше вафат булды, 16 кеше төрле тән җәрәхәтләре алды. Чагыштырып карасак, 2012 елда 14 юл һаләкәтендә 3 кеше вафат булып, 23 кеше тән җәрәхәте алган иде. Шул ук вакытта, 2013 елда спиртлы эчемлекләр кулланып транспорт белән идарә итү буенча рекорд куелды - "шайтан" коткысына бирелүчеләр - 125 шофер! Башка еллар белән чагыштырганда, билгеле, бу бик күп. Мәсәлән, 2011 елда андыйлар 114 булса, 2012 елда - 98 булган. Күргәнебезчә, бу бик зур үсеш, әмма артка таба. Әгәр әлеге исерек машина йөртүчеләр вакытында тоткарланмаган булса, күпме бәла- казаның сәбәпчесе булыр иде. Бу турыда уйларга да куркыныч. Юл кагыйдәләрен бозуга килгәндә, 2011 елда - 3980, 2012 елда - 1736 административ протокол төзелгән булса, 2013 елда аларның саны 2850 булган. Юл кагыйдәләрен үтәүне тикшерүдә безнең участок инспекторларының да өлеше бик зур. Узган елда алар тарафыннан 739 протокол төзелгән, 8 исерек шофер тоткарланган. Шулай ук 2013 елда административ кодексның 20.25 маддәсенең 1 өлеше буенча, вакытында штраф түләмәгән өчен 5 протокол төзелгән. Яңа елга кергәнебезгә берничә көн генә булса да, инде 3 кеше спиртлы эчемлекләр кулланып машина йөрткән килеш тоткарланган. Хөрмәтле машина йөртүчеләр! Алда язылганнарны укыганнан соң, уйлансагыз иде. Яңа елда яңа рекордлар кирәкме, әллә юкмы - бары сездән генә тора.