Әтнәдә – көрәш бәйгесе

Кышлау авылы мәдәният йортында " Таң" күмәк хуҗалыгы призына көрәш бәйгесе булып узды.

Яңа ел бәйрәмнәре алдыннан " Кыш бабай" призына үткән , күчтәнәчләре белән катнашкан һәр баланы сөендергән бу бәйгенең быел вакыты азрак кына авышса да, кунаклар саны элеккедән дә күбрәк булуы аның дәрәҗәсе елдан -ел артуы турында сөйли. " Әлеге бәйге быел алтынчы мәртәбә уза. Беренче елларда анда 35 ләп бала катнашса, бүген бездә 95 бала көч сынашачак", - диде бәйгене ачып җибәреп күмәк хуҗалык рәисе Алмаз Сибагатуллин.

Дөрестән дә 1999 елгы һәм аннан да кечерәкләр арасында узган көрәш бәйгесенә үзебезнең районнан гына түгел, Арча, Биектау, Мари Иле республикасының Бәрәңге, Морки районнарыннан, хәтта Йошкар Оланың үзеннән килүчеләр дә бар иде. Катнашучыларның географиясе киңлеге үзе үк көрәш бәйгесенең ни дәрәҗәдә оешканлыгы турында сөйли.

Реклама

Егетләр -егетләр инде, аларның көрәшкә тартылуы канда дисәм дә, ялгышмам. Ә менә алар арасында чәчен үреп салган кыз баланы күрү бер минем өчен генә гаҗәп булмагандыр. Йошкар Оладан Рудия Габдуллина 6 сыйныфта укый икән. Бирегә ул шәһәрнең спорт мәктәбе директоры Илдус Гарипов белән бергә килгән. Илдус абый үзе безнең яклардан, Чембулат авылында туып үскән. Рудия үз авырлыгында җиңүгә үк ирешмәсә дә, бердәнбер кыз буларак, махсус бүләккә лаек булды.

Көне буе барган бәйгенең җиңүчесе исемен көндәшләрен күпкә артта калдырган Әтнә командасы яулады. Икенче урында - Мари Иле, өченчедә арчалар, дүртенче урынга исә биектаулар калды. Күмәк хуҗалык җиңүчеләргә саллы призлар да әзерләгән, аларга берәр мең, җиде йөз һәм биш йөзәр сумлык акчалата бүләкләр тапшырылды. Командага җиңү китергән егетләрнең исемнәрен дә атап китми булмый. Менә алар: 1 урын алучылар - Айзат Филатов, Марат Гатауллин, Риназ Шакиров, Булат Фәхриев; 2 урын ияләре - Рәсим Сәләхетдинов, Азат Камалиев, Данис Самигуллин, Рүзәл Хакимов; 3 урынга лаек булучылар - Илшат Мавлиев, Наил Тазиев, Илгиз Хәкимов. Көрәш бәйгеләре җиңүчеләре арасында бу егетләрнең исемнәрен киләчәктә дә ишетербез дип өметләник.

Бәйгегә килгәндә, мондый очрашулар ешрак булсын иде. Гомумән, көрәш безнең өчен ят нәрсә түгел. " Монда килү үзе үк зур батырлык", - ди бит әнә спорт мәктәбе директоры Ирек Мөхәммәтшин да. Көрәш өчен җанын фида кылган аның кебек фанатлар булганда, мөмкинлектән чыгып ярдәм итәргә әзер Алмаз Сибагатуллин, Айдар Шәрипов кебек җитәкчеләр булганда чыннан да, бу спорт төренә игътибар кимүгә юл куелмас дип ышаныйк.