Әтнәдә мобиль кабул итүләр эшли башлады

Әлеге проект махсус график нигезендә алып барыла. Әйтүләренчә, ул республиканың һәр районында уза, теләгән һәр татарстанлы үз авыл җирлегендә кызыксындырган соравын бирә ала, тәкъдим ясарга мөмкин, шул исәптән Россия Федерациясе Дәүләт Думасы депутатлыгына кандидатка наказ бирә ала. Партия аңлатуынча, республикадан булачак депутатларның парламенттагы эшчәнлекләре татарстанлылардан җыелган шул наказлар нигезендә оештырыла.

Әтнә районындагы беренче шундый очрашу якшәмбе көнне Яңа Шашы авыл җирлеге янәшәсендә 10.00-12.00 сәгатьләрдә узды.

Биредә әти-әниләр исеменнән гомуми урта мәктәпнең статусын саклап калу, шулай ук авыл җирлеге үзәгендә яңа мәдәният йорты булдыру проблемаларын күтәрү очракларын ассызыкларга мөмкин. "Мәктәпнең базасы нык, укытучылар коллективы да бик яхшы", - дип билгеләделәр. "Авыл җирлегендә бер юньле мәдәният йорты булса иде", - диюләрен дә аңларга була. Сүз уңаеннан, мобиль җәмәгать кабул итү пункты нәкъ иске мәдәният йорты каршында узды. Моннан тыш, муниципаль хезмәткәрләрнең хезмәт хакларын күтәрү мәсьәләсен карауларын да сорадылар.

Кышлау авылы мәдәният йорты каршында да шундый ук кабул итү 13.00-15.00 сәгатьләрдә үткте. Биредә авыл хуҗалыгында эшләүчеләргә субсидияләр бирүне, үзара салым программасын дәвам итүне дә сорадылар.

Кыскасы, барлык сораулар да партия исеменнән депутатлыкка кандидатларга үз блоклары буенча бүленәчәк. Шуңа күрә нәтиҗәсе дә уңай булыр дигән өмет бар.

Кабул итүне округ буенча координатор, Дәүләт Думасы депутаты ярдәмчесе Диләрә Шәрәфиева, депутатлыкка кандидат вәкиле Карина Богданова алып барды.

Шунысы игътибарга лаек: безнең район кечкенә, сораулар аз булыр дисәләр дә, кыска гына вакыт эчендә 8 сорау һәм 1 тәкъдим ясарга өлгерделәр.