Әтнәдә әти-әниләр дә дәрес тыңлый

Олы Әтнә мәктәбендә ата-аналар җыелышлары бара. Быел ул үзгәрәк итеп оештырылган. "5;6 нчы дәресләргә әти-әниләрне чакырдык. Җыелыш буласы көнне әти-әниләр башта математика, рус теле кебек төп фәннәрне сайлап дәресләргә кереп утыралар. Балаларының дәресләргә әзерлеге, катнашуы белән бергә, тәртибе белән дә танышалар. 15 гыйнварда - 6; 9 сыйныф укучыларының, 16 гыйнварда - 7 сыйныфлар, җомга көнне 8; 11 сыйныф укучыларының әти-әниләре килә, ә дәресләр беткәч җыелыш үткәрәбез. Башта гомуми өлеше, анысы төгәлләнгәч, сыйныфларга таралып, һәр фән укытучысының чыгышын тыңлап, фикер алышалар",- ди мәктәп директоры Лидия Хәкимова.