Мәктәпкәчә белем бирү учрежденияләре тәрбиячеләре арасында елдагыча бәйге башланып китте. Быелгысы - экология елына багышланган. Әлеге бәйгене узган елдагы кебек үк Дусым балалар бакчасы башлап җибәрде. Тәрбияче Ләйсән Ханафина нәниләр белән "Урманда кунакта" исемле кичә әзерләгәннәр. Бакчага җиде генә бөртек бала йөрсә дә, Ләйсән аларның барысын да җәлеп итә алган....
Мәктәпкәчә белем бирү учрежденияләре тәрбиячеләре арасында елдагыча бәйге башланып китте. Быелгысы - экология елына багышланган.
Әлеге бәйгене узган елдагы кебек үк Дусым балалар бакчасы башлап җибәрде. Тәрбияче Ләйсән Ханафина нәниләр белән "Урманда кунакта" исемле кичә әзерләгәннәр. Бакчага җиде генә бөртек бала йөрсә дә, Ләйсән аларның барысын да җәлеп итә алган. Ике яшьлек Рәзинәгә хәтле җырлыйсы җирдә җырлый, биисе урында бии. Балаларның телләре чиста, һәр сүзләре аңлашыла. Бергәләшеп чүпләнгән чишмәне чистарттылар. Шулай табигатьне сакларга өйрәнәләр алар.
Күәм балалар бакчасында безне Шүрәлеләр, Су аналары белән кызыклы сәяхәткә дәштеләр. Тәрбияче Рафия Гатауллина балаларны дару үләннәре белән таныштырды. Ә урман ияләре, үзләре уздырган дәрестә, табигатьтә үзеңне ничек тотарга кирәклеген аңлаттылар. Күбәләкләрнең нинди әһәмияткә ия булулары, ни өчен урманны сакларга кирәклеге турында балалар аңлап калгандыр дип өметләник. Кызыклы сәяхәт җыр, бию белән үрелеп барды. Күнгәр балалар бакчасында исә "Табигать - чиксез хәзинә" дигән темага шөгыль әзерләгәннәр. Бакчада катнаш группа, шуңа да нәниләр белән зурлар бергәләп катнаштылар. Тәрбияче Фирдинә Әхмәтшина чарага иҗади яктан килгән. Урман аланында кулдан эшләнгән җиләкләр, гөмбәләр... Сабыйлар дару үләннәренең исемнәрен атадылар, күбәләк белән бергәләп җырладылар, биеделәр. Ә менә Кышлау балалар бакчасында тәрбияләнүче балалар җир шарын елмайту өчен нинди кызыклы моментлар гына күрсәтмәделәр. Тәрбияче Равия Абдуллинаны электән фантазиягә бай, сәләтле тәрбияче икәнен белә идем. Экология елы уңаеннан күрсәтелгән чыгышы моны тагын бер кат раслады. Бакчага йөрүче 10 баланың тугызы (әле аларның да дүртесе өч яшьлекләр, ә нәни Азалиягә бары ике генә) күрсәткән шөгыльне исебез китеп карадык. Менә ичмасам фантазия, хыял иреге. Гореф -гадәтләр белән дә бәйләгәннәр. Сәяхәтләре - һава шарында булды. Җырладылар, биеделәр... Аяк бармаклары ярдәмендә тау куышын вак ташлардан чистарттылар. Кошларга җимлек ясап, аларны да ашаттылар. Чын мәгънәсендә тамаша булды бу. Нәниләр табигатьнең дуслары булырга сүз бирделәр. Җир шарын тәки елмайттылар алар. Яңа Шашы сабыйлары исә "Табигатьнең әдәплелек сараена сәяхәт" кылдылар. Сәяхәтләре "елга" буйлап, көймәдә булды. Серле сандыктагы әкиятне танып белделәр. Су безгә ни өчен кирәк ? дигән сорауга да җавап бирделәр. Алтын балыкның су төбендәге чүпләр турында зарын да тыңладылар. Урман җәнлекләренә ярдәм иттеләр, авыру куянның колагын дәваларга доктор Айболитны чакырдылар. Кошларны тавышларыннан танып белделәр. Урау юлларны үтеп, әдәплелек сараена да килделәр. Нәниләр белән чын мәгьнәсендә зур эш башкарып чыкканнар апалары. Һәм бу барлык балалар бакчасына да кагыла. Дөрестән дә, эшләре күз алдында. Күңелле шөгыльләрдә катнашу сабыйларның үзләренә дә кызык. Табигатьне саклау бүгенге көннең иң мөһим проблемаларының берсе. Һәм моңа кечкенәдән өйрәтү зур савап.
Иң мөһим һәм кызыклы язмаларны Татмедиа Telegram-каналында укыгыз
