Әтнәдә ул референдум нигезендә башкарыла

без сезне тыңлыйбыз

"Комыргуҗа авылы хакимияте зират кирәк-ярагына дип, пропискада булган кеше башыннан 500әр сум акча җыя. Нинди эшләргә? Ник кеше башыннан, ә хуҗалык саныннан чыгып түгел? Һәм ник акчаны авыл халкыннан җыялар? Хакимиятнең бюджеты кайда да, акчасы кая? Һәм тагын бер сорау: пропискада булган кешедән генә акча җыелгач, пропискада тормаган кешене авыл зиратына күмәргә рөхсәт булмаячакмы инде?

Гөлназ Габдрахманова".

Сорауларга Комыргуҗа авыл җирлеге җитәкчесе Әхтәм Зиннәтуллин җавап бирде.

Газетаны даими укучылар хәбәрдар, күп авыл җирлекләрендә җирле референдумнар үткәрелде. Анда бер генә сорау иде: пропискада булган кеше башыннан билгеле күләмдә акча җыярга ризалык алдылар. Авыл җирлегендә башкарыласы эшләрнең күләменә бәйле рәвештә, җыясы акча күләме төрле булды. Референдум Комыргуҗада да үтте, халыкның зур күпчелеге 500әр сум акча җыярга ризалык бирде. Димәк, бу эш референдум нигезендә башкарыла. Төрекләр өлеше - юлга, Мәрҗәннеке юлга һәм зират коймасы тотуга юлланса, Комыргуҗаныкы зиратны әйләндерү өчен тотыла.

Аңлашыладыр, бу максатчан финанслау, чөнки хөкүмәт халыктан җыелган һәр сумга өстәмә 4 сум бирә. Ә инде бюджет акчасына килсәк, ул эшләрне башкару өчен авыл җирлегенең генә түгел, күмәк хуҗалыкның да көче җитмәячәк. Пропискада булмаучыларны зиратка күммәсләр дип борчылмагыз. Анысы элекке тәртиптә үк башкарылачак дип ышандырдылар.

Фотода: Каенсар авылында узган референдум вакыты.