Әтнәдән дә делегат катнаша

Казанда Бөтендөнья татар яшьләренең алтынчы форумы уза. Дөньяның 24 иленнән, Россиянең 43 төбәгеннән һәм Татарстаннан җыелган барлыгы 600 делегат катнаша. Алар арасында безнең районнан Әтнә балалар сәнгать мәктәбе директоры Алия Хәнәфиева да бар. "Башка төбәкләрдә яшьләр ничек яши, шуларны күреп, ишетеп кайтасым килә, - диде ул. Форумның ачылыш тантанасы һәм төп чарасы - пленар утырышы 2 августта башкаланың Г.Камал театры бинасында булды. Анда татар яшьләренең бердәмлеген ныгыту, нинди мохиттә яшәүләренә карамастан, ана телен өйрәнү, милли мәдәниятебезне, традиция, гореф-гадәтләребезне саклау мөһимлеге турында сөйләштеләр.