Әтнәлеләр! Казандагы мандарин төсендәге юл сезнең өчен түгел

Казанга барсагыз игътибар итәсездер, юлларда мандарин, кишер төсендәге тамгалар барлыкка килә башлады.

Машина йөртүчеләргә бу юллардан хәрәкәт итү тыела. Керә калсагыз,

1500 сум штрафны кесәңнән чыгарып түләргә кирәк булачак. Чөнки әлеге мандарин төсендәге тамгалар Су спорты төрләре буенча дөнья чемпионаты кунакларын йөртү өчен хезмәт итәчәк. Билгеләрне эшләү инде тәмамланган, шуңа күрә Казан эчендә сак булырга кирәк, чөнки мондый тамгалар Казанның 11 урамында бар! 9 августка кадәр мондый юлдан йөрмәгез, чөнки шул вакытка кадәр тамгалар гамәлдә булачак.