Әтнәләр дә Рязань белән сөйләште

Безнең өчен хәрби комиссариатның телекүпер үткәрүе яңалык түгел. Саратов өлкәсендәге 71432 хәрби часть белэн байтак аралашты әти-әниләр. "Ә калганнар " гел күңелгә тынгылык бирмәде.
Ә бүген күңелгә үзгә тынычлык иңде. Әти-әниләр Рязань шәһәренең 62632 -"В" хәрби частендә хезмәт итүче уллары- дүрт солдат белән әңгәмә кордылар. Ә без, ике районның журналистлары, башка частьләрдә хезмәт итүче егетләрне дә, ә алар, 201 һәм 48 хәрби частьтә хезмәт итәләр, онытмауларына инандык. Дүрт солдатның икесе: Хәйбуллин Алмаз (Кышлау егете), Шәрәфиев Зөлфәт (Кече Әтнә) - Әтнәнеке! Алмазның әти-әнисе килә алмаса да, Зөлфәтнекеләр - Зөлфирә белән Нәкыйп Шәрәфиевләр очрашуга килгән иде. Үзләре дә бу чараны шулай кабул иттеләр, әтисе ныклык күрсәтсә дә, ана күңеле нечкә шул, ул кичерешләрне әйтеп анлатып та булмый.
- Мондый күперләр турында газетада язылганны укый идем, тик күз алдыма тулысы белән китерә алмадым, рәхмәт хәрби комиссариатка, часть җитәкчеләренә, безгә бүләк ясадылар. Иң сөендергәне: Зөлфәтнең туган көненә бүләк булды бу, 30 апрельдә аңа 20 яшь тулды...,- дип сөйли Зөлфирә Зөлфәр кызы.
Әти-әниләре белән беррәттән Татарстан Республикасының Арча һәм Әтнә районнары хәрби комиссары Алмаз Борһанов та котлады Зөлфәтне.
- Һәр егетне туган көне, бәйрәмнәр белән котлауны оештыра башладык. Район башлыгы, үзебезнең исемнән солдатларны туган көннәре белән котлауны сорап, хәрби частькә хат юллыйбыз. Шуның нигезендә алар безнең егетләрне котлыйлар. Зөлфәт котладылармы сине?- дип сорады Алмаз Әгъзәм улы. Зөлфәт җавап итеп, баш селкеде һәм рәхмәтен белдерде.
- Ашаталармы, ач түгелме сез, кыерсытмыйлармы?...
Әти-әниләрне тагын ни кызыксындырсын инде... Үзләре үк сорауларына җавап та бирделәр, "Кая начар ашатсыннар инде, безнең Зөлфәт тазарган да" , - ди Зөлфәтнең әтисе. "Безнеке дә" - дип өсти Орнашбаштан килгән Рәзинә Локманова, улы Әнәс белән аралашкач.
Арча мәчете имамы Рәмис хәзрәт догалар укып, егетләрнең исән-сау кайтуларын теләсә, хәрби комиссарны әзерлек мәсьәләләре кызыксындырды. "Ничек әзерлик, таләпләрегез нинди?"- дип сорады ул өлкән лейтенанттан.
-Бар да әйбәт, сезнең солдатлар яхшы әзерлек белән киләләр, без канәгать, тәртипләре дә яхшы...- диде өлкән лейтенант Матягин.
Горурланырлык солдатларыбыз бар,Аллага шөкер, әти-әниләренә сабырлык бирсен Ходай, исән-имин күрешергә язсын. Ә оештыручылар әҗерен күрсен! Балаң өчен җаваплы кешеләр барын күреп тору да ышаныч уята.