Әтнәләр, өзмәгез!

"Ашыт" сакланышында йөрергә, аккошларыбызны күзәтергә, челәннәрне карап сокланырга яратабыз. Гомумән, табигатькә берәү дә битараф түгел, тик дус та түгел без хәзер табигать белән.

Ни кызганыч, кая барсак та, ташланган чүп-чарга, шешәләргә юлыгабыз, адәм баласы кайда да үз эзен калдырырга сәләтле. Менә шуны истә тотып, сакланыш хезмәткәрләре үзләренең биләмәләрен карап-барлап кайттылар.

"Сакланыш территориясендә техника йөрмәгәнме, җиләккә килгәндә таптап бетермәгәннәрме, балыкчылар җәтмә белән балык тотмыйлармы, ял итүчеләр тиешле урыннарда гына утырамы...- менә шуларга игътибар иттек. Аллага шөкер, диеп әйтик, тәртипсезлекләргә очрамадык. Балыкчылар да кармак белән генә тота. "Тәртипләрне беләбез", диюләре ошады", - ди "Ашыт" сакланышының инспекторы Рәшит Әхмәтҗанов.

Ашыт суында (фотода - "Ашыт" заказнигы. С.Мингатина.) төнбоеклар чәчәк ата башлаган, ак төнбоекның "Кызыл китап" ка кертелгәнлеген искәртәсе килә. Кыскасы, "Агын да, сарысын да өзмәгез", дип кисәтә сакланыш хезмәткәрләре.