Әтнәнең тагын бер хуҗалыгында савым сыерлары заманча тәрбияләнә

- Ике озын торакта 4 төркем савым сыеры булачак. Әлегә торакларның берсендә 336 савым сыеры тәрбияләнә. Икенчесенә 330 баш буаз тана урнашты, аларны Гөлсинә Васыйлова тәрбияли. Ә уртада - савым залы, - дип башлады сүзен ферма мөдире.

Монда һәр торакта ике төркем терлек тәрбияләнә. Тәрбия шартлары шул ук үзебезнең ысулга нигезләнә: калын салам аслыкта сыерларны бәйләмичә тәрбиялиләр, буе белән ашату һәм тирес чыгару аралыгы урнашкан. Савымчылар сменалап эшлиләр. Беренче сменада Гөлнара Сафина, Нәридә Хәкимова, Хәлимә Сафина көч куя. Икенче сменада - Гәүһәрия Хәкимова, Илдария Әхмәтова һәм Резеда Хәкимова. Беренчеләре иртәнге 4.30дан 11.30гача, икенче сменадагылар 15.30дан 21.30га кадәр эшлиләр. Монда дежур савымчы дигән әйбер юк.

- Чөнки махсус терлекчеләр - Линар Гәрәев белән Рашат Хәкимов та сменалап эшлиләр, - ди.

Оператор Гүзәл Габдрахманова бер үк вакытта компьютерчы да. Кыскасы, эш шартлары барысы да заманча. Шөкер, савымчыларны, терлекчеләрне һәр сменада берәр тапкыр ашатып-эчертәләр.

Иң кызыгы - савым залында. Ике якка тезелгән сыерларны баскычтан аска төшеп, аппаратлар белән саудыралар.

Реклама

- Берьюлы 32 сыерны савабыз, якынча өч сәгать ярымда тәмамлыйбыз, - диләр савымчылар.

Алар белән дә әңгәмә кордык.

- Тояк чирләре нык кимеде. Хәер, әлегә ниндидер нәтиҗә ясарга иртәрәк, әмма монда эш шартларының күпкә уңайлырак булуы бәхәссез, - дип шатланалар.

Тагын бер яңалыкка куандым. Иске торакларны да яңартып яталар. Монысына аеруча савымчылар куана: "Болай булгач эшсез калмыйбыз икән", - диләр.

Автор фотосында (сулдан уңга) "Таң" хуҗалыгының уңган савымчылары Хәлимә Сафина, Нәридә Хәкимова, Гөлнара Сафина.