Вакытында түләвең хәерле

"Административ штрафны вакытында түләмәүчеләр бар. Бүгенге көндә шуларның исемлеген төзибез", - диде эчке эшләр министрлыгының "Әтнә" полиция бүлеге хезмәткәре Фәнис Нәҗмиев.

Тулырак мәгълүмат алу теләгеннән, аңа кабат мөрәҗәгать иттек.

• Законда административ хокук бозулар өчен административ җәза бирү каралган. Ягъни штраф сугалар, арест салалар һ.б. Штраф сукканнан соңгы гамәлләрне карап үтик әле, - диде ул.

Әгәр дә штраф суксалар һәм ул карар законлы көченә керсә, 60 көн эчендә тиешле сумманы түләргә кирәк. Вакытында түләмәсәң, административ хокук бозулар турындагы кодексның 20.29 маддәсе, 2 өлеше буенча җавап тотарга туры киләчәк. Анда күрсәтелгәнчә, бу - штрафны 1 мең сумнан да ким итмичә икеләтә күләмдә түләү яки 15 тәүлеккә кадәр арест салу, яисә, 50 сәгатькәчә мәҗбүри эшләргә җәлеп итү.

• Ни кызганыч, штрафны вакытында түләмәүчеләр безнең район авылларында да бар. Аңлашыладыр, андыйларны закон нигезендә җаваплылыкка тартабыз, - диде полиция хезмәткәре.