Әтнә таңы

“Военкоматка аерым сәлам...”

"Телемост" барышында Саратов өлкәсе Вольск шәһәрендә хезмәт иткән 71432 нче хәрби часть солдатлары тарафыннан иң күп әйтелгәне шул булды. Бишенче тапкыр үткәрелгән әлеге чараның үзгәлекләре дә бар.

Реклама

- Әни! Син мине ишетәсеңме? Микрофонга якынрак кил әле. Ничек сез?
- Ярый, улым, ярый. Без исән-сау...
- Елама инде, монда әйбәт, күрмисеңмени тазардым да.... ярты ел гына калды. Күп сөйләшә алмыйм, һәркемнең сөйләшәсе килә, барчагызга сәлам. Әби, син дә елама! Тиздән кайтам...
Арча мәдәният йортында чәршәмбе көнне Татарстан Республикасының Арча һәм Әтнә районнары хәрби комиссариаты тарафыннан үткәрелгән "телемост" әнә шулайрак барды. Күз яшьләре, шатлыгы-сөенече, бер-береңне котлау, юату, аңлату...- әйтерсең,бер гаилә. Бернинди читләшү, кыенсыну юк, балалар язмышы берләштергән. Шул дәрәҗәдә якынайганнар ки, очрашуга килмәгән (андыйлар да бар!) әти-әнине икенчесе алыштыра: "Улым! Борчылма, сезнекеләр әйбәт, килә алмадылар. Синең белән бик горурланабыз, молодец!" Хәтта Арча башкарма комитеты җитәкчесе урынбасары Надия Мифтахетдинова да безнең Әтнә егетләрен үзләренеке кебек күреп, якын итеп сөйләште. Аларга: "Без сезнең белән горурланабыз!"- дигәч, рәхәт булып китте. Белеп сөйли.
- Делегация составында Саратовка солдатлар янына бардым. Бөтен казармаларда булдык, гаражларга кердек. Бу частьта безнең 54 егет, 10сы - Әтнәдән, хезмәт итә, һәркайсы белән сөйләштем. "Борчымыйлармы, тиргәмиләрме, кыерсытмыйлармы?"- дип сорадым. Берсе дә зарланмады. Дөрестән дә зарланырлык түгел, часть командирлары да бик яхшы кешегә охшаган. Ул канәгать безнең егетләрдән. Бу часть турыдан-туры Мәскәүгә буйсына. Күчтәнәчләр төяп бардык, очрашу ахырында өстәл әзерләп сыйладык үзләрен,- дип әти-әниләрне тынычландыра.
- Гыйнвар аеның өченче декадасында тагын барырбыз, дип торабыз. Посылкалар җибәрә аласыз. Размеры 30×40булсын. Алар аны куанып кабул итәләр, бер табынга җыйналып сыйланалар. Часть белән без әйбәт мөнәсәбәттә, шуңа күрә үзебезнең егетләрнең күбесен шушында урнаштырырга тырышабыз. Тәрбия эшләрен дә бергәләп алып барабыз. Башка частьләрдә хезмәт итүчеләрне уйламыйлар икән, дигән уй калмасын. Һәр часть белән элемтәдә торабыз. Ул частьләр белән "телемост"ларны хәрби комиссариатның үзендә үткәрәбез.Улларыгызны чыгарып җибәреп, алар әйләнеп кайтканчы без һәр солдат өчен җаваплы,- дип сөйли хәрби комиссар Алмаз Борһанов.
Сүздә түгел, чынлап шулай икәнен раслыйлар. Республикада беренчеләрдән булып "телемост" керттеләр, хәзер башкалар алар үрнәген өйрәнә - очрашуда катнашкан кеше хокуклары буенча вәкаләтле вәкил Ринат Һидиятов, Рәмис хәзрәт, Василиск атакай да әнә шул фикерне әйттеләр. Ә командирлары Владимир Алексеевич частьнең яшәеше белән таныштырды. "Безнең 1нче мобиль бригада Һәрвакыт сугышчан әзерлектә һәм анда иң-иңнәр хезмәт итә. Быел Ерак Көнчыгышка хәби бурычны үтәргә туры килде. 9 майда Мәскәүдә үтәчәк парадта катнашачакбыз, телевизордан улларыгызны күрерсез...",- дип тә сөендерде. Соңыннан солдатларга концерт күрсәттеләр.
Чара тәмамлангач та, әниләр үзара җыйналып фикер алыштылар. "Армиягә озатканда да бу кадәр күңел нечкәрмәгән иде, елаттылар бүген". " Улым 30 майда киткән иде. Сөйләшеп торабыз. Телефоннан сөйләшү бернәрсә, ә монда үз күзең белән күрү бөтенләй икенче. Бөтенесен берьюлы. Тынычланып каласың, мин бик рәхмәтле",- ди Бәрәскәдән килгән Флера Ибраһимова. Башкалар да шулай ди. Теләкләр дә уртак, исән-сау кайтсыннар.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: