Яңа Әтнәдән Раилгә кем ярдәм итәр?

Редакциягә аның дусларыннан хат килде. "Ремонтларлык та түгел, диделәр. Көннәр буе япа-ялгыз. Аңа бик авыр. Кредитка бик алыр иде, инвалидларга кредит бирмиләр. Инвалидлар декадасында берәр миһербанлы эшмәкәр расрочка белән ноутбук бирә алмас микән? Аз-азлап түләп бетерер иде..."

"Үзе ул кемнәндер шалтыратып, ярдәм сорарга ояла, кыенсына. Алдан ук бик зур рәхмәт Сезгә!"- хат әнә шулай тәмамлана. Раил Хәкимов Яңа Әтнә авылында берүзе көн күрә. Юлда машина бәрдереп киткәннән соң, ике аяксыз кала ул. 2009 елда булган бу коточкыч вакыйганы тыныч кына искә дә төшерә алмый. "6 ай борылып та ята алмадым. Үз-үземә кул саласы килгән минутларым күп булды. Бу дөньяда кызым Зәринә алып калды. Бер күрермен дип өметләндем, әле дә өметләнәм. Аңа инде 8 яшь. Кечкенә кызлар күрсәм, күзгә яшьләр килә. 3 яшенә алтын алка, аннан соң велосипед алып бирдем. Минем барлыкны белсә, әйтсәләр, үскәч булса да бер күрермен әле, дигән уй тота. Бик авыр вакытларда әтием Фоат тәрбияләде. СПТУда бергә укыган Альберт бик булышты. Больницага да сумка тутырып ул килә иде, хәзер дә ташлаганы юк. Роберт дигәне эзләп килде, анысын хәтерләми дә идем. Урыннан тора алмый яткан вакытымда килеп махсус җайланмалар эшләп, күнегүләр ясатты Альберт. Акрынлап утыра башладым. Аннан коляскада утыру теләге туды. Колясканы социаль яклау бүлеге бирде. Альбертка тагын тотынырга бер тимер торба куйдырттым. Иртән торгач шул торбага тотынып, тоткыч ярдәмендә коляскага утырам. Авыр чорны үттем. Ашарга пешерәм, керне машина юа, идәнне пылесослыйм. Яз җиткәч, үзе сыга торган швабра белән тәрәзәләрне юам. Чүп-чар арасында яшисем килми минем..."- ди Раил үзе. Чынлап та өе бик чиста, ник бер тузан булсын.

Берәү бәхетенә таш эри, берәү бәхетенә май ката, диләр. Иң авыр вакытында ялгыз кала ул. Әнисе Сания апа аңа кадәр кисәк кенә вафат була, әтисе Фоат соңрак дөнья куя.. Сау-сәламәт шофер булып эшләп торганда өйләнә, тик гаилә тормышы барып чыкмый. Аерылышалар. Гыйнвар аенда Раил авариягә очрый, февраль аенда хатыны кияүгә чыга. "Ул чакта 15 минут тора алмый идем аларны уйламыйча. Үтте... ,- ди. - Марзыя апа исән булсын. Акча бирәм, кибеттән ашарыма ул алып кайта. Түләүләремне почтальон Сәлимә түли. Тәмәкене техникум укучы Инсаф алып кайтып бирә. Абыем Фаил ике айга бер кайта. Башка кеше килгәне юк"

• Карны кем көри?
• Ничек була инде, узган ел күмеп тә киткән иде. Егетләр ачып та куялар...
• Ноутбукны ничек алган идең?
• Әтинең машинасын саткач, абый алып биргән иде. Җәй көне ватылды. Ике кулсыз калдым. "Контакт"та бергә армиядә бергә хезмәт иткән егетләрне табып бетергән идем, аралаша идек..

Реклама

Дөнья белән бердәнбер аралашу чарасы да булган. Булыр әле ул. Җаны иманга сыенган кешеләр җитәрлек бит бездә. Раилне дә онытмаслар.