“ҖӘЙЛӘРНЕ НИЧЕК УЗДЫРЫРЛАР...”

Йөзгә караган әбекәйләрнең төрлесе бар: кайсы урыныннан да тора алмый, кайсы аңында түгел, кайсы сөйләшкәндә бутала, нихәл итәсең, яшь үзенекен итә, язмыштан узып булмый, дип уфтанабыз. Ә Комыргуҗада гомер итүче Сания әбекәйне район советы рәисе урынбасары Айрат Каюмов, ветераннар советы рәисе Мингазиз Зиннәтов, социаль үзәк хезмәткәре Гөлшат Галимҗанова, Комыргуҗа авыл җирлеге башлы­гы Әнәс Хәкимов, жирле ве­те­­раннар советы рәи­се Гөл­­синә Мөхәммәтҗано­ва бе­лән бергәләп юби­лее белән котларга баргач, юбилярны тыңлап вакыт үткәнен дә сизмәгәнбез. Авызына каратты әбекәй, балачагы, яшьлеге, бөтен тормышы күз алдыннан үткәндәй булды. Гомер яшәвең белән түгел, яшәвеңне тоюың, гамәлләреңә бәя бирә алуың, булганыңа шөкер итә белүең белән мәгънәле икән. "Аллага шөкер, күршеләрем бик әйбәт, балаларым, кияүләремне әйткән дә юк. Яшелчәләр утыртам, карыйм, үстерәм, ишегалдына җыеп куям, күршеләрем күтәреп кертә. Бик әйбәт йөри идем әле, 6 ел элек гөл балчыгы алырга барган җирдән егылып таякка калдым. Хәзер таяк белән икәү өй эчендә йөреп торабыз. Сөйләшергә тел генә бар, башка эшкә ярамыйм. Болай да әллә нәрсә тоҗырган кеше түгел инде мин. Югары җитәкчеләр искә алып котлагач рәхмәт инде. Вакытында эшләдек анысы, балалар үстерүе бер дә җиңел булмады, яслеләр юк, балаларны өй алдына чыгарып, чиләк астына ашарларына куеп, өсләренә юрган ябып эшкә китәм, суыру машинасында эшлибез. Олылары кечеләрен калдырып, ишек алдыннан ары китмиләр. Сәвия тугач, ясле булды, 3 айлык баланы бишеге белән кертеп куйдым да, "Бу бала яшәмәс инде, карый алмаслар", дип өйгә чыгып еладым. Бик әйбәтләп карадылар. Ул вакытта МТСлар монда чак, ирем Нигъмәтҗан трактор бригадиры булып эшләде, ул юллар, "Я Ябынчыда, я Соңгырда батып утырабыз", дип шалтыратыр иде. Бик яхшы кеше иде, иртәрәк китте бабай, 5 бала: 3 малай, 2 кыз үстердек, ул үлгәч тә 21 ел яшим инде, җир җимертеп эшләп йөргән көннәр әллә кайда калды", - дип исенә төшерә әбекәй. Уфтанып та куя. Олыгаю сагынырга өйрәтә күрәсең. Бәлки әнә шул яшь чактагы төсләрнең җетелеге яшәргә көч тә өсти торгандыр. Мингазиз абыйның: "Без дә 70тә инде" диюенә: "Җитмешләр ярый икән әле ул", - дип ел­маерга мәҗбүр итә. "Әни, мин дә 56да дип әйтәм, ара-тирә. "Әле кыз вакытларыгыз", дип кенә җибәрә", - ди кызы. Менә шундый җор телле, тәне белән картайса да күңеле белән картаймаган әбекәйгә Россия президенты Владимир Владимирович Путин, районыбыз башлыгы Габделәхәт Гыйлемхан улы Хәкимовның котлау открыткаларын, истәлекле бүләкләр тапшырып кайттык. Ә әбе­кәйнең "Радионы яратып тыңлыйм, телевизорга исем китми, татар телен­дәгесен яратам, яңа­лык­ларны күршеләргә дә сөйлим. Илдәге хәлләргә борчылып та куям, элек тә булгандыр инде ул шартлаулар... Еллар гына тыныч булып, парлыларга тигезлектә яшәргә язсын. Ул киләсе җәйләрне ничек кенә уздырып җибәрерләр инде дип борчылам..." дигән сүзләре истән чыкмый. 90 яшь! Гаҗәп бу картлык!