Әтнә таңы

“ЗАМАНЧА БИНА ОЗАК ХЕЗМӘТ ИТСЕН”

Тәкъбир тавышы астында Югары Сәрдә авылында яңа фельдшер-акушерлык пункты ачтылар. - Бәйрәм бүген! - Шатлык-куанычның иге-чиге юк. - Советлар Союзы җимерелгәннән соң, безнең авылда беренче зур тө­зе­леш бу. Мәчет янәшәсендә төзелгән фельд­шер-акушерлык пункты ачылышын авыл халкы әнә шулай куанып каршы алды. Шунда ук төзелеш тарихы белән таныштыручылар да табылды. -...

Тәкъбир тавышы астында Югары Сәрдә авылында яңа фельдшер-акушерлык пункты ачтылар.

- Бәйрәм бүген!

- Шатлык-куанычның иге-чиге юк.

- Советлар Союзы җимерелгәннән соң, безнең авылда беренче зур тө­зе­леш бу.

Мәчет янәшәсендә төзелгән фельд­шер-акушерлык пункты ачылышын авыл халкы әнә шулай куанып каршы алды. Шунда ук төзелеш тарихы белән таныштыручылар да табылды.

- Стеналарын тиз өйделәр. Эчке эш­ләре генә озаккарак сузылды. Ә тер­риторияне үзебезнең егетләр матурлады. Авыл җирлеге башлыгы Рә­шит Хөснетдинов, авылдашлар Айрат Гыйльманов һәм мәктәп укучылары профнастилдан койма тоттылар. Җирне тигезләп, чәчәкләр дә утырттылар. Эчтәге уңайлыкларны күреп, искитәрлек. Нәкъ шәһәрдәгечә. Электр энергиясе белән җылытыла. Бүлмәләре якты, иркен...

Авыл җирлеге башлыгы исә:

- "Шахтер" җаваплылыгы чикләнгән җәмгыятенә, аның җитәкчесе Әнәс Хәкимовка зур рәхмәт. Материаллар белән булышты. Скважина да, канализация дә казытты, - диде.

Реклама

Тантанага килгән район советы рәисе урынбасары Айрат Каюмов авыл халкын район башлыгы исеменнән котлады.

- Бик матур, бөтен уңайлыклары да бар. Шулай да бирегә еш килергә язмасын. Сокланып карап, яныннан гына узып китәргә тырышыгыз, - дип шаяртып та алды.

Моңа каршы Әтнә үзәк больницасының баш табибы Азат Гарипов:

- Шулай да якын көннәрдә үк килү­че­ләр булыр, мөгаен. "Диспансерлаш­ты­ру" программасы буенча, кайберәү­ләр­не шушы фельдшер-акушерлык пунктына чакыртып карарга туры килер, - диде.

Фикерләре уртак. Шундый матур бина бүләк иткән Татарстан Республикасы Президенты Рөстәм Миңнехановка, аны Югары Сәрдәдә төзеткән район башлыгы Габделәхәт Хәкимовка рәх­мәт җиткерделәр.

Фельдшер-акушерлык пунктын ачканда авылның дин тотучылары бер сафка тезелеп, тәкъбир әйттеләр. Авыл мулласы яңа бина ачылуга үзенең хәер-фатихасын бирде. Фельдшер-акушерлык пунктының мәчет янәшәсендә калкып чыгуы да символик мәгънәгә ия. Мәчет картлары беравыздан:

- Заманча бина халыкка озак хезмәт итсен. Биредә тикшеренеп, дәва алып, шифа-сихәтләргә ирешергә язсын, - дигән теләкләр җиткерделәр.

Монда эшләячәк фельдшер мәсьә­ләсен дә хәл иттеләр. Элеккесе эш­тән киткәч, бу вазифа вакантлыга әйләнгән иде. Баш табиб әйтүенчә, үз авылларыннан булган яшь кадрны укытып кайтару мөмкинлеге бар икән. Югары Сәрдә халкы өчен монысы өстәмә куаныч булды. Кызганычка каршы, бик озак уйлашсалар да, андый кешене таба алмадылар. Әлегә ерактан балкып торучы "медицина йорты"нда Яңа Җөлбидән Ләлә Хәйруллина эшли.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: