Әлфирәле дөнья - уйландыра торган дөнья!

Олысы - кечесе төштән соң Ары мәдәният йортына ашыкты. Яңгыр сибәләп тора, ә әбиләрең чәчәк, чүлмәге белән гөл күтәреп,  зонтиксыз килеш мәдәният йортына килә. Берәм-берәм.

- Авылыгызның бер башыннан бер башына йөреп чыкмалы түгел бит, яңгыр ява, куркытмадымы,- дип сорашам.

"И балам, без бер бүген шулай йөрибез, Ә Әлфирә гомере буе яңгыр-кар димәде, көн димәде, төн димәде, авыру янына чыгып йөгерде. Авыл нәрсә ул, авыл эчендә йөреп була, әле аның Яңа Бәрәскәсе, Бахтачысы бар бит. Юлы бармыни аның. Әле авыл эчләренә азрак таш җәелде, авылга асфальт килде.  Юлсыз җирдә күпме интекмәде ул. Киләбез, авыл белән килерләр, Әлфирә безнең өчен яшәде, әле дә яши. Менә гөлемне генә саклап бетереп буламы", - дип гөлен пальтосы эченнән чыгарды бер әби.

Берәм - берәм таякка таянып килгән апаларны барлыйм. Балалы әниләр килә. Берсе дә буш кул белән түгел.

    Ул да түгел Күлле Киме авыл җирлеге башлыгы Хәмит Гәрәев килеп керде. "Бу көн авыл халкының кичерешләренең чагылышы кебек, фельдшерсыз калабыз, дип борчыла бар да. Дөрес, аның урынына  ике шәфкать туташы чираттан килеп, икешәр сәгать эшләп китәләр. Ә халык Әлфирәгә йөгерә", - ди.

    Авыл халкы, үзләренә 36 ел буе хезмәт күрсәтеп, үзләрен дәвалаган фельдшерларын - Әлфирә Тәлгать кызы Хөснетдинованы хөрмәтләп лаеклы ялга озатты. Түр башына менгереп утыртып, аның хөрмәтенә "Шәфкать тулы тормыш сукмагы", дип исемләнгән кичә үткәрде. Әлеге чараны мәдәният йорты җитәкчесе Раилә Кадимова белән аның тормыш иптәше Фидаил Кадимов оештырды.

Арыда узасы әлеге чарага район үзәк больницасының "Ашыгыч ярдәм" машинасында Гөлия Мифтахетдинова, Илсияр Шиһапова  белән бергәләп бардык.

Авыл халкының бердәмлегенә сокланып, бергәләп кайттык. "Минем мондый кичәне дә, мондый бердәм авылны да күргәнем юк иде", - дип әйтеп куйды Гөлия Фәрит кызы да.

Ә мин  үзем гади фельдшерны зурлап, икәүләп Арыга барган бу сәламәтлек саклау хезмәткәрләренә сокландым.  Мари чигендәге кечкенә авылга бармасалар да сүз әйтә алмаслар иде, котлауның мең дә бер чарасы бар, ә алар аны хөрмәт итеп зурлап барып, зурлап чыгыш ясадылар. 

     Әлфирәле дөньяга исем китеп кайттым. Әлфирәле дөнья - хөсетсез дөнья, Әлфирәле дөнья -  бай дөнья, Әлфирәле дөнья - рәхәт дөнья,  Әлфирәле дөнья  - шәфкать тулы дөнья, Әлфирәле дөнья - хөрмәт тулы, эчкерсез  дөнья. Әлфирә  кебекләр үзен белештермичә эшли инде алар, моңа гаҗәпләнәсе юк, мин менә шул эшләгәнне күрә белеп, дәррәү кубып, авыл белән Әлфирәне зурлаган халыкка сокланып, рәхмәт әйтеп  кайттым.