Бәрәскәдә – динебез почетта

Бүген авылның агач мәчетендә җыелган бу апа-әбиләр әле күптән түгел генә Коръән укырга өйрәнеп азапланганнар иде.
Бүген менә, инде теләсә-кем көнләшерлек итеп, тәҗвид белән, махраҗларын да тиешенчә чыгарып, Коръәнне тулысынча укып чыктылар. Хәер, моның тарихын баштан ук искә алып сөйләү дөресрәк булыр. Ахыр чиктә, аклы-каралы тормышны төсле итүнең кешенең бары үзеннән торуына бер дәлил бу. Люция абыстайның беренче чыгарылыш шәкертләре барысы бергә җыелып, Коръән хәтем кылырга уйлаганнар. Бергә җыелып уку күңеллерәк шул ул, башкалар алдында начар күренмәс өчен ихлас тырышасың, өстәвенә бер-береңнең хаталарын табып төзәтү мөмкинлеге бар, дип саныйлар.
– Ә гарәпчәгә өйрәнергә килгән вакытта әлифне таяк дип белми идек...
– Бәрәскәдә дини тәрбия Әдһәм абый белән Люция апа кайткач күтәрелде... 
– Тырышып, елый-елый Коръән өйрәндек. Коръән Аллаһ Раббыбыз янына алып менә торган бау диләр. Шул бауны безнең кулга алар тоттырдылар...
– Коръән хәтем кылуны да куркып кына башлаган идек...
Әнә шулай бер-берсен уздырып элеккеләрне искә алдылар. Курыкмыйча Коръән хәтем кылуга тотынган апа-әбиләр барысы унау икән монда. Кызганыч, беренче чыгарылыш әби-апалар арасында инде вафат булучылар да бар икән. Фикерләре бердәй – инде Коръән чыгуның нигезе бар, ә моннан соң гамәл кылу үзләреннән тора. Булыр, Аллаһ боерса, гамәл кылулары да изге булыр: балаларын, оныкларын, якыннарын, дусларын һәрберсе Коръән укуга тартыр дип ышаныйк. Әнә бит, бирегә килгәндә дә араларында, намаз укырга булса да өйрәнермен дип килүчеләр булган.
Узган елның көз ахырында – ноябрь аенда башлап, Коръән укуны шушы көннәрдә төгәлләгәннәр. Аны багышларга Әдһәм хәзрәтне чакырганнар. Бу изге эшне Коръән укырга өйрәткән Люция абыстай үзе үк оештырып, башкарды да. Искитәрлек бит, җәмәгать: кичәге колхозчылар гарәп телендә бик матур итеп Коръән укыйлар. Инде шушы белемнәрен изге юлда тотарга насыйп булса иде. 
Шундый изге эш башкарган апа-әбиләрне котларга дип “Ленин” җитештерүче авыл хуҗалыгы кооперативы нәселле заводы җитәкчесе Илгиз Хәйруллин, Түбән Бәрәскә авыл җирлеге башлыгы Аида Фатыйхова, күмәк хуҗалыкның ветераннар советы җитәкчесе Сөембикә Садриева да килгәннәр. Алар Әдһәм хәзрәткә һәм Люция абыстайга, шушы әби-апаларга ихлас рәхмәтләрен җиткереп, һәрберсенә күчтәнәчләр тапшырдылар. Илгиз Хәйруллин:
– Авылыбызның хөрмәткә лаек, күркәм, хөрмәтле апалары! Шушы күркәм айда матур вәгазьләр сөйләп, Коръән укуыгыз безнең өчен гүзәл үрнәк. Әдһәм абый, Люция апа – сезгә аерым рәхмәт, бик күп кешене укытып, күзләрен ачтыгыз, туры юлга чакырдыгыз. Авылда хәзер Коръәнне дөрес итеп, матур итеп укучылар бик күп. Инде киләчәк буыннарыбыз да шушы юлны дәвам итсәләр иде, – дип изге теләкләрен җиткерде.
Ветераннар советы җитәкчесе исә:
– Мин Люция абыстайда да, Әдһәм хәзрәттә дә укыдым. Коръәнне кулга алган саен аларны уйлыйм, – дип ассызыклады.
Аида Фатыйхова да:
– Шушы мөбарәк, җомга көнне Коръән хәтем кылу үзе зур бәхет. Мин үзем Люция абыстайда да, Әдһәм хәзрәттә дә, Фирдия остазда да белем алдым. Сездә алган белем нигезе миңа һаман булыша, – дип билгеләде.
Монда ни әйтергә инде?! Бары тик – “Ленин”дагы мондый чаралар өчен һич гаҗәпләнерлек түгел дияргә кала. Чынлыкта шулай бит!
Ә бу белем бирүләрнең нигезе “Ике чиләк бәрәңге кыйссасы”на барып тоташа икән. Бу хакта Әдһәм хәзрәт сөйләде. “Түбән Камада яшәгәндә гаражга бәрәңге алып кайтырга бардым. Ут юк. Трамвайлар йөрми. Бик озак көттем. Шул вакытта, “Авылда булсам, болай азапланып йөрер идемме?” дигән фикер килде. Авылга кайту уе әнә шул вакытта туды”, – ди.
Ә Люция абыстай – 7 сыйныф белемле хәлдә “Мөхәммәдия” мәдрәсәсен “Кызыл диплом”га тәмамлаган 157 кеше арасыннан 4нең берсе!
Кыскасы, 6666 аяте, 114 сүрәсе, 30 парәсе, 15 сәҗдәсе, 4 сәктәсе белән бары Аллаһ Раббыбыз хозурына ирешсә иде дип башкарган Коръән-Кәрим кабуллардан булса иде.