Җомга иртәсе мөбәрәк булсын

Динебез безне һәркем каршында әдәпле булырга, күркәм мөгамәлә кылырга өйрәтә. Ләкин, кешенең күркәм холкын беренче чиратта аның иң якын, иң кадерле булган әти-әнисе күрергә тиеш.

Бер кеше пәйгамбәрдән: «Миңа нинди изге эш кушарсың?» - дип сораган. Ул: «Әниеңә изгелек кыл», - дигән. Теге кеше соравын яңадан кабатлаган. Пәйгамбәр: «Әниеңә изгелек кыл»,- дигән. Ул тагын шул сорауны биргән. Пәйгамбәр янә: «Әниеңә изгелек кыл», - дигән. Дүртенче мәртәбә сорагач, ул: «Әтиеңә изгелек кыл», - дип әйткән (Бохари риваяте).

Бүген җир өстендә 8 миллиардтан артык кеше яши диләр. Мөселман кешенең диненә, милләтенә, тән төсенә карамастан, һәркемгә карата күркәм мөгамәлә кылырга тиешле. Әмма, каршыбызга шушы 8 миллиард кешене тезеп бастырсалар, изгелек кылуда башта 3 урынны әниеңә, аннан әтиеңә, аннан иң якын булган кешеләреңә, аннан калганнарга бирәсең.

Бүген кайбер кешеләр үзләренең дуслары, хезмәттәшләре, җитәкчеләре белән йомшак итеп сөйләшәләр, матур итеп елмаялар. Бу яхшы сыйфат. Әмма, шул ук кеше газиз әнисен күргәч(кайчак исеме телефон экранында чыккач), олыгайган әтисен күргәч, аның көләч йөзе дә кядыр китеп югала, йомшак тавышы да калынаеп китә. Дөньяда беркем дә синең ихлас елмаюыңа, назлы карашыңа, җылы сүзеңә әти-әниеңнән лаеклырак була алмый. Башта алар, аннан калганнар… 

Йә, Раббым, безне кечкенәдән кадерләп үстергәннәре өчен, Син дә алардан риза бул. Исәннәренә тәүфыйк, вафат булганнарын ярлыкагыл.