Бу көзләр шулкадәр алҗытты...

Бу кырпак яңгырның тамчысы
Битләргә кершәндәй сыланды...
Быел көз шулкадәр алҗытты,
Кышлары нигәдер соңлады.

Көзләрнең күгенә эленгән
Кояшы бер яна, бер сүнә...
Шәһәрнең фонарьлы урамын
Яңгырдан коелган моң күмә.

Күзләрне арыткан сорылык
Караңгы юлларда чагыла.
Усал җил битләрне чеметеп,
Чәчләргә томандай сарыла.

Бу көзләр шулкадәр алҗытты,
Яңгыры өшетә күңелне...
Күкләрдән коелган тамчылар
Кемнеңдер күз яше түгелме?..