Бу гомернең, бу тормышның кадерен белеп яшик!

   Бик мәшәкатьле заманда яшибез. Ашыгабыз, кабаланабыз, соңга калабыз, дөнья куабыз. Бәхәсләшәбез, бер-беребезнең хәтерен  калдырабыз, аннан  ничек итеп гафу үтенергә белмибез. Шагыйрь Әнгам Атнабаев язганча “Бу кешегә һаман нидер җитми... ә кайчакта ифрат аз җитә: бер җылы сүз – күңел эретерлек наз җитә”. Мин әле һаман да бүгенге очрашудан  алган хисләрдән айный алмый утырам...

   Районыбызның Әтнә үзәк китапханәсе тарафыннан  китап укучылар өчен оештырылган чираттагы кызыклы да, эчтәлекле дә, җан җылысы белән сугарылган очрашу турында сүзем.  Кем белән соң очрашу дисезме?

   Татарстан Республикасының атказанган сәнгать  эшлеклесе, күпкырлы талант иясе – үзенчәлекле, хисле һәм кабатланмас шигырьләре белән халык мәхәббәтен яулаган шагыйрә, танылган җырлар авторы, журналист Ләйлә Дәүләтова кунакта булып, иҗатка, сәнгатькә гашыйк булган тамашачысын  үзенең иҗаты белән таныштырды.

    “Иҗатта да үз принципларым бар. Кечкенәрәк чакта шигырь яза идем дә, әнигә: “Ошыймы?” – дип күрсәтә идем. Бервакыт әни: “Үзеңә ошыймы соң? Үзеңә ошаса, кешегә дә ошар”, – дип миңа бик матур киңәш бирде ди Ләйлә ханым.  “Җыр, шигырь озак вакыт күңелемдә йөри, илһам килгәч, тиз генә утырам, бер мизгелдә язып куям. Иң мөһиме – ул вакытта үзем генә булырга тиеш”, - дип дәвам итте ул сүзен. Бу фикер белән бер ничек тә килешмичә мөмкин түгел. Чөнки иҗат кешесе һәрбер нәрсәгә карата мөнәсәбәтен үзенең йөрәге, җаны аша уздыра. Шуңа да авторның шигырьләрдә  тирән фикер, эчке тоемлау, тормыш тәҗрибәсе урын алган. Юкка гына кичәнең исеме дә шагыйрәнең иң уңышлы  шигыренең исеме белән “Кеше булып кал...” дип аталмагандыр. Мин бу шигырьне кичтән  берничә кат укып чыгып, аның эчтәлегенә күпме гыйбрәт, күпме фәлсәфи уйланулар, үтемле киңәшләр салынганына исем киткән иде. “Кеше булып кал...” шигырьдәге төпле  фикерләрне яшь буынга “Тормыш кагыйдәләре” итеп алырлык.

       Заманында меңләгән тамашачыларның иң яраткан тапшыруы булган “Адәм белән Һава” тапшыруы киләчәктә кабат телевизон экраннарга кайту мөмкинлеге белән дә соендерде тыңлаучыларны Ләйлә ханым. Амин,шулай булсын!

      Район мәдәният бүлеге, районыбызның үзәк китапханәсе хезмәткәрләре кичәне әзерләүгә иҗади якын килгәннәр. Татарстан атказанган артисты Алсу Хәбибуллина һәм яшь җырчыбыз Әдилә Хәмидуллина башкаруында Ләйлә Дәүләтова сүзләренә иҗат ителгән җырларны башкару ямь өстенә нур өстәде. Әтнә туган якны өйрәнү музее җитәкчесе Әлфинә Мөхәммәтҗанованың, Габдулла Тукай исемендәге Әтнә дәүләт драма театры  артистлары Зөһрә Мәхәммәтгалиева һәм Илназ Шакирҗановның Ләйлә Дәүләтованың шигырьләрен профессиональ осталык белән башкарулары сокландырды.

     Очрашу чын мәгънәсендә җылы атмосферада узуы белән тамашачы күңелендә матур тойгылар, илаһи җылылык  калдырды дип уйлыйм. Кичәдә катнашучыларның һәрберсе дә тормышның кыйммәтен аңларга, Аллаһка шөкер итә белергә,булганын сакларга кирәген тагын бер кат инангандыр дип уйлыйм. Язмамны шагыйрәнең бик мәгънәле шигырь юллары белән төгәллисем килә:

Начарлык болай да күп бит...

Матур сүз генә дәшик.

Бу  гомернең, бу тормышның

Кадерен белеп яшик!

Фәхретдинова Раилә