Депутат Динарт белән очрашты

Иң элек депутат «Бердәм Россия» партиясенең җирле иҗтимагый кабул итү бүлмә­сендә борчыган сораулары булучыларны кабул итү үткәрде.
Очрашу барышында аңа 5 кеше мөрәҗәгать итте. Яшь һәм күп балалы гаиләләр өчен дәүләт программалары, социаль контракт мәсьәләләре, шулай ук махсус хәрби операциядә катнашучыларга түләүләр турында сораулар бирелде. Депутат гражданнарның барлык мөрәҗәгатьләрен игътибар белән тыңлады һәм җентекләп өйрәнү һәм эшкәртү, мөмкин булганча ярдәм итү өчен контрольгә алды. Камил Нугаев балачактан 1 группа инвалид булган Динарт Әхмәтшинны сыендырган Бадиковлар гаиләсендә булды. Динарт картлык көнендә ялгыз калмавы, үзенә якын җаннар да табуына сөенеп бетә алмый. 
Бадиковлар Олы Әтнә авылында шундый сирәк гаиләләрнең берсе. Райзалә «Изгелек» халыкка социаль хезмәт күрсәтү үзәгендә социаль хезмәткәр булып эшли. Ул үзе тәрбияләгән һәркем белән уртак тел табарга тырыша. Аның яхшылыкка юлы инде берничә ел элек, алар опекага гаиләгә кыз бала алгач башланган. 
«Караган, тәрбияләнүче кешеләр минем башкарган эшем өчен рәхмәт әйтәләр икән, аннан да зур бәхет юктыр. 
Кемгәдер файдалы була алуыма, изге эш эшләвемә һәм һөнәр сайлау­да ялгышмавыма шатланам», - ди Райзалә үзе.
«Өлкән кешене тәрбиягә алу гаиләсе» пилот проекты кысаларында гаилә ике өлкән кешене үз карамагына алган иде. Нурсөя Гыйльметдин кызы тәрбиягә алган гаиләдә 4 ел яшәгән. Аннары гаилә олы яшьтәге Гадинә Абдуллинаны кабул итә. Камил Нугаев гаилә әгъзалары белән аралашты һәм аларның барлык сорауларына җавап бирде. Ул билгеләп үткәнчә, аларның гаилә үсеп килүче буын өчен үрнәк булып тора. Бары тик шундый кешеләр ярдәмендә генә игелеклелек һәм кешелек­лелек сыйфатларының беренче урында булачагын ассызыклады.