«Казан утлары» журналы «Сез иң гүзәл кеше икәнсез» әдәби бәйгесе җиңүчеләрен бүләкләде

Конкурс 2023 ел Россиядә укытучылар һәм остазлар елы уңаеннан оештырылып, Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән үткәрелде.

«Укытучыга җәмгыятьнең мөнәсәбәте – җәмгыятьнең рухи көзгесе. Җәмгыять укытучыны үрнәк шәхес дип бәяли белә икән, ул җәмгыять рухи яктан чиста, сәламәт дигән сүз. Укытучы җәмгыять алдында җаваплы шәхес булырга тиеш», – диде Марат Әхмәтов үз чыгышында.

«Яшәгән саен балачак укытучыларын сагынабыз. Укытучы ул безнең өчен тормыш идеалы кебек кабул итә иде. Безнең чорда укытучыга мөнәсәбәтнең нинди булуы әле дә хәтеремдә. Чөнки мин үзем дә укытучы баласы. Ул бүген дә исән-сау, бу зур бәхет», – дип дәвам итте ул.

Ул соңгы 30-40 елда тормыш кыйммәтләре нык үзгәрүен ассызыклап, бу әдәби бәйгене оештыру шушы «мактап әйтеп булмый торган күренешләр фонында» укытучыга игътибарны юнәлтү өчен игълан ителүен әйтте.

Марат Әхмәтов әдәбиятта укытучы темасын яңартырга алынган журнал редакциясенә рәхмәтләрен җиткерде. «Укытучы образын киләчәктә дә күтәрергә тиеш. Җәмгыять сафланырга тиеш», – диде ул.

«Быел остазлар елы. Без укытучыларыбызны быел гына түгел, гомер буе хөрмәтләргә тиешбез. Без укытучыларыбызга гомер буе бурычлы. Уңышларыбыз бар икән, моның өчен әти-әниләребезгә һәм укытучыларыбызга рәхмәт!» - диде үз чыгышында бу тантанага чакырылган Татарстан Рәисе карамагындагы мәдәниятне үстерүгә ярдәм фонды башкарма директоры Нурия Хашимова.

Ул редакциянең ветераннарын котлады. Биредә 35 ел эшләгән Лилия Гатауллинаны һәм озак еллар хезмәттәшлек иткән Алмаз Хәмзинны аерым котлады

Бәйгенең максатлары, бурычлары һәм нәтиҗәләре белән «Казан утлары» журналының баш мөхәррире Рөстәм Галиуллин таныштырды. Ул бу темага бик икеләнеп алынуларын, беренче укытучыны сагынуга кайтып калган күңелсез әсәрләр килмәсме дип борчылуларын яшермәде.

«Быел да Сирия, Төркия кебек илләрдән дә катнаштылар. Нәтиҗәләрне күреп шаккаттык – милли мәгариф үз эченә күпме язмышларын сыйдырган икән. Моның сәбәбе аңлашыла да, чөнки татар халкы гомер-гомергә белемгә тартылган, остазга хөрмәт белән караган, башка төрки халыклар – казахлар, кыргызлар, үзбәкләр – безне бүген дә мөгаллимнәр дип атый. Без шушы традицияне дәвам итәбез, яңартканбыз булып чыга», - диде ул.

«Без бу конкурс белән укытучыны хөрмәтли, мәгариф системасындагы проблемаларны яктырта алдык. Димәк, без максатыбызга ирешкәнбез. Күркәм традиция алга таба да дәвам итсен иде - укучыларның игътибарын җәлеп итә торган милли темаларыбыз әле бик күп», - диде ул сүзен йомгаклап.

Конкурска килгән әсәрләргә мисал буларак, Гөлүсә Батталованың «Чыра» хикәясеннән өзек яңгырады. Әтнә районы, Күәм авылының 3 нче сыйныф укучысы Аяз Батталов «Телимме мин укытучы булырга?» дип аталган шигырен укырга махсус чакырылган иде.

Җиңүчеләр

Хикәя» номинациясе:

• 1 урын – Ркаил Зәйдулла, Казан, «Кани калды Нишапур».
• 2 урын – Гөлүсә Батталова, Әтнә, Күәм, «Чыра».
• 3 урын – Әнисә Зәйнуллина, Казан, «Очрашу».

Кызыксындыру бүләге:

• Алия Мөбарәкшина, Казан, «Таң сызылганда».
• Айзилә Сабирова, Казан, «Минем яраткан усал укытучым».
• Наил Шәрифуллин, Лениногорск, «Шагалиев шәүләсе».

«Повесть» номинациясе:

• 1 урын – Әлфирә Галиева, Аксубай, Яңа Дума, «Сары атым алтын нукталы».
• 2 урын – Асия Юнысова, Казан, «Сылукай».
• 3 урын – Гөлинә Гыймадова-Хисаметдинова, Казан, «Усал».

Кызыксындыру бүләге:

• Нурания Гыйльметдинова, Теләче, Олы Нырсы, «Мөнбәрле мөгаллим».
• Гөлназ Нуриева, «Бәзәкә тавы», Чаллы.
• Сания Әхмәтҗанова, Казан, «Чын кешеләр».

«Сез иң гүзәл кеше икәнсез» бәйгесенең мәктәп укучылары арасында җиңүчеләр:

• 1 урын. Назлыгөл Гайнетдинова. «Укытучыма мәдхия». Теләче, Баландыш мәктәбе, 9 нчы сыйныф.
• 2 урын. Рәдиф Миңнеханов. «Сез иң гүзәл кеше икәнсез». Мамадыш, Усәли, 5 нче сыйныф.
• 3 урын. Әмир Фәрхуллин. «Укучының хәлен аңлыйсың». Мамадыш җәнлек совхозы, 11 нче сыйныф.

Кызыксындыру бүләге:

• Раил Мәрданов. «Укытучыма». Балтач районы, Норма, 5 нче сыйныф.
• Камилә Демидова. «Укытучыма». Яр Чаллы, 37 нче мәктәп, 9 нчы сыйныф.
• Аяз Батталов. «Телимме мин укытучы булырга?». Әтнә районы, Күәм, 3 нче сыйныф.

Җиңүчеләргә акчалата премияләр тапшырылды.

Татар-информ