Сөт җыялар – документлары тәртиптәме?

Әтнә район­ының авыл хуҗалыгы идарәсе мөдире Ленар Сәмигуллин, ветеринария бүлеге җитәкчесе Руслан Фәйзрахманов, бу оешмаларның белгечләре, авыл җирлекләре башлыклары, авылларда шәхси хуҗалыклардан сөт җыючы эшмәкәрләр белән җыелыш узды.
– Бер кашык дегет бер мичкә балны буйый диләр бит. Бөтен республика буенча алсак та, кемнеңдер белешмәсез, лаборатор тикшерүләрсез сөт җыюы халык саулыгы-сәламәтлегендә чагылыш табарга мөмкин, – дип саный Казаннан килгән вәкил Идрис Гатин.
Әлбәттә, беренче чиратта сөт җыю­чыларны күз алдында тота ул. Тиешле документлары булмаса, халыктан сөт җыюны туктатырга, шулай ук җаваплылыкка тартырга кирәк дигән фикердә.
Руслан Фәйзрахманов исә:
– Аеруча басым ясап әйтергә телим – читтән документларсыз терлек кертергә ярамый. Җыелышта катнашучыларның һәрберсе моны күз уңында тотарга тиеш, – дип ассызыклады.
Дөрестән дә, халык арасында читтән арзан бәягә китергән малны сатып алучылар да бар. Әмма андый малның сау-сәламәт булуына бернинди гарантия юк. Ә бу үз чиратында, алган продукциянең авыру чыганагы булуына китерә. Монысы – безнең сәламәтлегебез белән бәйле.
Идрис Гатин үләксә базларын да телгә алды. Бу очракта төзеклеген генә түгел, тулылыгын, янәшәсенә үләксә маллар ташланмаган булуны да гел күзәтеп торырга кирәк дип билгеләде.
– Бездә биотеррорчылык елы дәвам итә. Бу термин сугышка гына кагылмый. Чөнки биотеррор әнә шул авыру маллар аркасында да килеп чыгарга мөмкин, – ди ул.
Ленар Сәмигуллин да: 
– Бик кирәк иде мондый җыелыш. Сөтнең бәясе һәм сыйфаты һәрдаим күз уңында булырга тиеш, – диде.
Кыскасы, авыл хуҗалыгының һәр өлкәсендә ветеринар-санитар документлар булу, башкача әйтсәк, халык кулланган һәр төр продуктның чиста булуы кирәк. Бу очракта Идрис Гатин сүзләрен кулланып: “Табиб – кешене, ә мал табибы бөтен кешелекне дәвалый”, – дию дөреслеккә туры килә.