«Уйнагыз, гармуннар!» республика фестивалендә катнашу өчен гаризалар кабул ителә башлады

Фестиваль-бәйрәм программасында: Галиәсгар Камал исемендәге Татар дәүләт академия театры каршында фестиваль-бәйрәмнең рәсми ачылышы, «Гармунчылар парады» – Татарстан Республикасы һәм Россия Федерациясе төбәкләре гармунчылары, үзешчән фольклор коллективларының бәйрәм йөреше (Тукай скверы – Бауман урамындагы җир асты кичүе – «Родина» кинотеатры – Татарстан Фәннәр академиясе – 1 Май мәйданы – Казан Кремле). Фестиваль Татарстан Республикасы һәм Россия Федерациясе гармунчылары һәм якты иҗат коллективлары катнашында Казан Кремле диварлары янында йомгаклау концерты белән тәмамлана.

• Беренче тапкыр бәйрәм 1985 елда уздырыла, шуннан бирле ел саен Татарстан Республикасы һәм Россия Федерациясенең башка төбәкләреннән гармунчылар катнаша. Декларация кабул ителү һәм Татарстан Республикасы көне билгеләнү белән бәйле рәвештә фестиваль 30 августта үткәрелә башлый. Традицион бәйрәмне үткәрү тәртибе дә сакланган.

Фестиваль-бәйрәмдә катнашу өчен 8 августка кадәр түбәндәге электрон адреска гариза җибәрергә кирәк: ug-2024@mail.ru