Әтнәләр Актаныштан Кубок алып кайттылар

Әлеге бәйге Актанышта 26 март-1 апрель көннәрне узды.

Ярышта барысы 20 район командасы чыгыш ясый. Әтнәнең Рәзилә Газизова, Азалия Әхмәтова, Айнур Гәрәев һәм Инсаф Бадиков составындагы командасы 15 балл туплый. Беренчесе - Күңгәрдән, калганнары - Олы Әтнәдән. Туплаган балларын гомуми алганда да аз дип булмый. Әйтик, көчле саналган Саба, Мамадыш командалары да шулкадәр үк балл гына туплыйлар.

- Команданың чыгышына килсәк, "+4"лек дип бәялим... "5"лек үк булмады - беренче урын алмадык бит, - дип куанып көлә тренер Раил Шакиров. Куанырлык та шул, Әтнәнең яшь шахматчылары көмеш медальләр тагып, икенче урынга бирелә торган Кубок яулап кайтты.

- Шахматчыларның әти-әниләренә дә, безнең белән бергә барып Актанышта бер атна торып кайткан шәфкать туташына һәм больницага да, безне гел автобуста гына йөрткән шоферыбызга да зур рәхмәт, ди ул.