Алар миңа якын, кадерле

1976-77 нче еллар. Казанда эшләгән чорым. Кемнәндер ишетеп, иптәш кызым белән "Саз" ансамбленә киттек. Ансамбль җитәкчесе Рифкать абый Гомәров безне беренче тыңлау белән үзләренә алды. Ул вакыттагы күңелле мизгелләр, иң кадерле истәлекләр хәзер инде төштә күргән кебек кенә. Ансамбльдә солист булып Алмаз Хамзин эшләде, үзенең мәзәкләрен сөйләп без яшь кызларның эчләрен катырып бетерә иде. Рифкать абый сызылып киткән кара кашлы, озын буйлы, ачык йөзле, бик чибәр кеше иде. Без аңа барыбыз да гашыйк идек. Яңа җырлар өйрәнүдән тыш без районнарга чыгып концертлар куеп йөрдек. Шулай бер октябрь бәйрәмендә, без "Саз" кызлары телестудиягә бәйрәмдә катнашырга бардык. Анда Заһид абый Хәбибуллин, Флера апа Сөләйманова һәм башка күп кенә шәхесләр катнаштылар. Шунысы истә калган: Заһид абый скрипкасында уйный башлады да, уйный да уйный туктата гына алмыйлар бит. Ә Флера апаның кигән кофтасы әле дә булса күз алдымда: ак җирлеккә зур зәңгәр түгәрәкләр төшкән бик матур кофта иде ул. Нәкъ шундый итеп апам миңа да кофта тегеп бирде. Шул кофтаны киеп, мин сәхнәләрдә җырлап йөрдем.
Икенче хатирәм "Миңлекамал" спектакле турындагы мәкаләне укыгач яңарды. Сагынуга түзә алмыйча, Казаннан кире Әтнәгә кайтып киттем. Сабиров Мөбарәк абый мине вакытлыча клубка эшкә алды. Мин кечкенәдән театр сәнгатенә гашыйк идем. 9-10 классларда укыганда Камал театры артисткасы Флера апа Хәмитова белән хатлар да алыштым әле, янәсе артистка булам. Клубта эшләгәндә "Миңлекамал" спектакле белән театрлар фестиваленә бардык. Шунда миңа да бер кечкенә генә рольне башкарырга туры килде. Сәхнәгә чыкканда мин чырылдап кычкырырга тиеш, әмма үзем " ничек кенә кычкырыйм инде",- дип борчылам. Минем чыгар вакыт җиткәч, кемдер бик каты итеп чеметеп җибәрде, авыртудан чырылдап ничек чыгып киткәнемне дә сизми калдым. Ул чеметүче - Гомәр абый Мәрдәнов иде. Әтнә дәүләт драма театры куйган "Миңлекамал" спектаклен мин дә карадым. Әмма минем күз алдымда шул чорда уйнаган Рәфкать абый белән Гөлнур апай, Җәүһәрия апай, Галимә һәм Вәсилә апайлар, Илсөяләр тордылар. Рәфкать абыйның кылый Хәлиме, күзләрен кылыйландырып уйнавы, үзе генә дә ни тора! Мин шул үзешчән артистларны карап үскән буын. Нигәдер минем күңелемә аларның уйнаулары якын һәм кадерле.
Соңгы елларда элемтә өлкәсендә эшләгәндә дә сирәк кенә булгани сәнгать чараларында бик теләп, очынып-очынып катнаштым.